Шарын шатқалына сенбі күні серуендеуге барған 360 адам санаулы секундтарда сел жүріп, саға бойымен біраз азаматты ағызып әкетеді деп ойламаған да еді. Шатқал ішін шайып өтіп, бір метр биіктікпен ағып келген селден қашқан жиырма адамның тоғызы ағыс арнасына түсіп шыға алмай ауыр жарақат алды. Оның екеуін сел тасқа апарып соғып мерт қылған. Ал он бір жастағы Зере есімді оқушыны сел 4 шақырымға ағызып әкеткен. Шарындағы трагедиядан кейін, оқиға орнына Әлібек Шынтемір барып келген еді.
Бұл Шарын шатқалының ішін шайып тұрып қап-қара болып аққан сел кезіндегі түсірілген қорқынышты кадрлер. Тас пен құм араласқан адуынды ағыс, ажалмен арпалысқан адамдарды анау тастың түбіне қарай сүйрей кеткені анық көрініп тұр.
ӘЛІБЕК ШЫНТЕМІР, тілші:
- Шарын шатқалындағы сан соқтырған селден жапа-тармағай қаша жөнелген келушілер жауыннан жасырынбақ болып осы жартасты ықтаған. Алайда селдің күштілігі соншалық мындағы жиырма адамның 9 ын ағызып әкеткен. Оның алтауын құтқарып алғанмен, 2 адамды сел мына тастың астына әкеліп бүктеп, мерт қылыпты. Тағы бір оқушыны ағызып әкеткен екен.
Қаза тапқан 26 жастағы жігіт Алматыдағы №199 гимназияның ұстазы. Ертіп барған шәкіртін құтқарамын деп бірге ағып кетіпті.
ҚҰТЛЫҚЖАН ЖҮНІСОВ, "Шарын"Ұлттық паркі туризм бөлімінің басшысы:
- Олар су келе жатқан кезде ойламаған бұндай су бізді алып кетеді деп. Осы жерден ол қыздың бетімен қолы ғана көрініп тұрған. Көрсеттік алғашқы көмегімізді, бірақ аман алып қала алмадық.
Ал ағыс бойымен сырғанап барып, тасқа соғылып барып тоқтаған алты адам түрлі дене-жарақатын алып, Ұйғыр ауданындағы орталық ауруханасына түсіпті.
МАЙРА ӘБІЛҚЫЗЫ, Ұйғыр аудандық Денсаулық сақтау басқармасының басшы орынбасары:
- Күндіз сағат екі жарымнан бастап алты науқас келіп түсті. Алтаусының төртеусі хирургия бөліміне жатқызылды. Ал екі науқастың жағдай жақсы болғандықтан біз оны аммбулаториялық емдеуге жібердік. Миының жабық шайқалуы болып саналады. Бүгінгі күнде барлық медициналық көмек көрсетілді.
Ал жапа шеккендердің жақындары жаңбыр жауатынын біле тұра оқушыларды шатқалға әкелген туристік компанияның жауапсыздығы деп шағым айтты. Оның үстіне олардың нұсқаушылары селді көре сала келушілерді қауіпсіз жерге шығаруы тиіс еді деп отыр.
АЛТЫНАЙ МӘЛІКОВА, Зеренің әпкесі:
- Он бес минуттың ішінде жаңбырдың суы жиналып сондай потоп болады екен. Оны инструкторлар білуі керек. Оны ешкім айтпаған. Мына инструкторлар туристерді алып барған оны білуі керек. Связь керек. Вышка керек. Ондай ештеңе жоқ. Шарын деген аты ғана.
Шарын шатқалына ақша төлеп, күніне 500-600 адам келсе де, лайықты қауіпсіз жағдай жасалмады деген келушілер тым құрыса мындағы қауіпсіздік қызметін күшейтсе дейді. Шарын ұлттық паркі қызметкерлері де келуші көп болған кезде үлгермей қалатынын айтады. Оның үстіне келушілердің көбі өздері жеке туристик компаниямен ілесіп келеді дейді. Ал сел болған күні аспан ашық болған деп отыр.
ЕЛНҰР МҰХАМАЕТЖАНҰЛЫ, "Шарын" мемелекеттік табиғи паркі директоры:
- 360-тан астам турист келген. Соның ішінде оқушылар келген елу адамдай. Туристік компаниялар ТОО Школа деген. Жалпы лицензиясы бар 12 туристік компаниямен жұмыс жасаймыз.
- Оның ішіне анау ТОО Школа деген кіре ма?
- Жо олар бізбен ешқашан договорға отырмаған екен.
- Онда неге кіргіздіңіздер?!
- Ал енді ол жерде біз ешкімді тоқтата алмаймыз. Ол азаматтық құқығына қол салу болады.
Жапа шеккендердің жақындарының сөзінше, сел болған күні ақысын алып аман-есен апарамыз деген әлгі туристік компанияның қызметкерлері де, 199-ыншы гимназияның басшылығы да байланысқа шықпапты. Енді олар осы апатты жағдайға жауапты қызметкерлердің жазаға тартылуын сұрайды.
Әлібек Шынтемір, Ринат Абулхайыров
Бізді әлеуметтік желіде оқыңыздар:
KZfaq - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#Шарын #трагедия #өлім #туризмнің_қаупі