#BirBax #xalqtəbabəti #dodaq
#sağlamlıq #azerbaycan #sağlık
Dodaqlarınıza baxaraq sağlamlığınız haqda məlumat ala biləcəyinizi bilirdiniz? Solğun, bozumtul, quru, hətta çatlamış dodaqlar daxilimizdəki problemlərin xəbərçisi ola bilir. Bəli, bir insanın dodaqlarına baxaraq onun necə qidalandığı haqqında məlumat əldə etmək mümkündür. Bu gün dodaqları “dinləyəcəyik”. Diqqətiniz məndə olsun.
Solğun, bozumtul dodaqlar. Adətən, qanazlığının əlamətidir. Qanazlığı iki cür olur: 1. dəmir əksikliyindən qaynaqlanan; 2. B12 vitamini əksikliyindən qaynaqlanan; Əgər bədəndə mis çatışmırsa, dəmirin mənimsənilməsində problemlər yaranır. Nəticədə, orqanizm dəmir ehtiyacı yaşayır. Dəmiri qırmızı ətdən, xüsusilə, içalatdan və dəniz məhsullarından ala bilərsiniz.
Qadınlar aybaşı zamanı qan itirirlər. Bu da qanazlığı səbəblərindən biridir. Bağırsaqlarda iltihablanma varsa, narahat bağırsaq sindromundan, kron xəstəliyindən əziyyət çəkirsinizsə, B12 də daxil olmaqla, əksər vitaminlərin orqanizm tərəfindən mənimsənilməsinə maneələr yaranır. Qanazlığı bir də o deməkdir ki, lazımi qədər heyvan mənşəli qida qəbul etmirsiniz. B12 vitaminin mənbəyi heyvan mənşəli qidalardır. Yəni dəmir əksikliyinin səbəbləri, eyni zamanda, B12 vitamini əksikliyinin səbəbləridir;
Mavi dodaqlar. Soyuqdan üşüyən insanların dodaqları mavi rəngə dönə bilir. Soyuq hava qanı daxilə doğru itələyir, nəticədə, dodaqlara yetərli miqdarda qan gəlib çatmır. Mavi dodaqların bir səbəbi də şok halıdır. Sianid turşusu ilə zəhərlənmə zamanı da dodaqlar mavi rəngə dönür. Aqata Kristi romanlarının əksinə, sianid turşusu zəhərlənməsindən ölmək labüd deyil. Çünki bu zəhərlənmənin müalicəsi var;
Tünd dodaqlar. Siqaret çəkənlərin dodaqlarının rəngi tündləşə bilir. Siqaret bədəndəki oksigen və qan dövranını yavaşıdır. Bundan başqa, siqaret melanin piqmentinə də təsir edir ki, nəticədə, dodaqlar daha tünd görünə bilirlər. Siqaret çəkənlərin dodaqlarının kənarlarında şaquli qırışlar da əmələ gəlir;
Quru və ya çatlamış dodaqlar. Ən geniş yayılmış səbəb Omega-3 yağ turşusu çatışmazlığıdır. Balıq yağı əsl Omega-3 qaynağıdır. Hazırda fast-foodların əksəri Omega-6 yağ turşuları ilə zəngindir. Əgər restoranlarda ayaqüstü menyularla doymaq vərdişiniz varsa, Omega-3 çatışmazlığı yaşamağınız təbiidir. Qarğıdalı yağı, digər bitki yağları kimi məhsulların tərkibində Omega-6 var və restoranlardakı yeməklərin əksəriyyəti bu cür yağlarla hazırlanır. Nəticədə, orqanizmdə Omega-6 yağ turşuları çoxalır, müqayisədə Omega-3 yağ turşuları azalır. Dodaqlar quruyur, çatlayır...
Qışda çatlayan dodaqların bir səbəbkarı da D vitamini çatışmazlığı olur. Dodaq gelləri, dodaq kremləri istifadə edənlər az deyil, lakin bu kosmetoloji vasitələr problemi kökdən həll etmir. Orqanizmin Omega-3 ehtiyacını ödəmək lazımdır. Çatlaq dodaqların “günah”ını sink əksikliyində də axtarmaq olar. Söhbət A vitaminindən gedəndə isə, əmin olun ki, normadan artıq qəbul etmisiniz, nəticədə, dodaqlarınız çatlayıb. Bəli, sızanaqlardan yaxa qurtarmaq üçün qida əlavəsi kimi qəbul etdiyiniz A vitamini toksikləşməyə səbəb olur. Orqanizm sizi vəziyyətdən hali etmək istəyəndə də dodaqlar çatlayır. Həddindən çox A vitamini qəbul etdiyinizdə, D vitamini sürətlə istifadə edilir. Orqanizm başlayır D vitamini həsrəti çəkməyə... D vitaminini qida əlavəsi kimi qəbul edin, amma həkim nəzarətində. Sink qəbulu üçün qırmızı ətə, dəniz məhsullarına üz tuta bilərsiniz;
Ağızın kənarlarındakı yarıqlar. B2 vitamini çatışmazlığının ənənəvi işarətidir. Rasionunuzda rafinə edilmiş şəkər bol miqdardadırsa, bu halla tez-tez qarşılaşmağınız mümkündür. B vitaminlərinin əksikliyini yaradan səbəblərdən biri lazımi qədər mikrobiom olmamasıdır. Ard-arda antibiotik içildiyində, buna baxmayaraq, mikrobiomu dəstəkləyən qidalar qəbul edilmədiyində xoşagəlməz vəziyyət yaranır. Mikrobiom B2 vitamini istehsal edə bilir. Yumurta sarısı, keyfiyyətli, təbii pendir, göyərtilər də orqanizmə B2 vitamini hədiyyə edir;
Gördüyünüz kimi, dodaqlara baxaraq orqanizminizin nəyə ehtiyac duyduğu haqqında məlumat əldə edə bilərsiniz.