Муус устар 9 күнэ - Кыыл Уолун күнэ
“Сунтаар сонуннара”, 09.04.24 с.
РСФСР култууратын үтүөлээх үлэһитэ, Саха АССР ускуустубатын үтүөлээх диэйэтэлэ, Үлэ Кыһыл Знамятын уордьанын кавалера, норуот ырыаһыта, Аар тайҕа талааннааҕа С.А. Зверев-Кыыл Уолун күнүн муус устар 9 күнүгэр 2019 сылтан бэлиэтиир үтүө үгэскэ кубулуйда. Саха куттаах, норуот тылынан уус-уран айымньытын өрө тутааччылар бу бэлиэ күнү Улуу, үйэҕэ биирдэ төрөөн ааһар киһи бэлиэ күнэ диэн ааттыыр буоллулар.
Санатан этэр буоллахха, 1948 сыллаахха, муус устар 9 кунугэр Сергей Зверев аан бастакы улахан наҕараадатын Үрдүкү Сэбиэт Президиумуттан бочуотунай грамота тутан үөрүү көтөллөммүт, олоҕор биир саамай улахан ситиһии кэлбит күнүнэн ааҕынар этэ. Ол иһин, 2018 сыллаахха Сунтаар улууһун дьокутааттарын Сэбиэтин бэһис ыҥырыылаах мунньаҕа бэс ыйын 8 күнүгэр 49-с уочараттаах сессиятыгар ахсыс нүөмэрдээх быһаарыытынан, муус устар 9 күнүн - Кыыл Уолун күнэ диэн быһаарыныы ылыммыта.
Бу күн Олоҥхо дойдутугар Сунтаарга Улуу киһини бэлиэтээн ааһар тэрээһиннэр ыытыллаллар. Кини пааматынньыгар С.А.Зверев-Кыыл Уолун аатынан УНАК үлэһиттэрэ саха сиэринэн алаадьы уурдулар.
Онтон биир улахан тэрээһин “Тоҕус оһуордаах түһүлгэ” Дьокуускай куоракка саҕаланна. Манна норуот тылынан уус-уран айымньытын толорооччулар 9 көрүҥҥэ: норуот ырыатыгар, тойукка, олоҥхоҕо, уус-уран ааҕыыга, саха мухыкальнай үнүстүрүмүөннэригэр оонньооһуҥҥа, ат симэҕигэр, оһуокайга, саха төрүт үҥкүүтүгэр, саха быһаҕын оҥорууга күрэстэһиэхтэрэ. Муҥутуур кыайыылаах улахан дьоҥҥо 300000 солк., оҕолорго 100000 солк, оһуокайга Дархан этээччи 100000 солк. ылыаҕа. Бу күрэс үһүс төгүлүн ыытыллар. Урукку сылларга Сунтаарга ыытыллыбыт буоллаҕына, быйыл Дьокуускай куоракка төрүттээтилэр. Уопсайа 16 улуустан норуот талааннаахтара муһуннулар. Сарсын кыайыылаах биллиэҕэ.
Мира АФАНАСЬЕВА.