Рет қаралды 40,376
Қазақстанда індет ушығып, карантин шаралары күннен-күнге күшейтіліп жатса да, жасырынып той жасайтындар азаяр емес. Солтүстікте мониторингтік топ ұзату тойы қызған кезде үстілерінен түсіп, жиналған қонақтардың барлығын қуып шықты. Ал Алматыда құдалық пен туған күндер тоқтатылып, түн ортасына дейін жұмыс істеген ойын-сауық орындары жауапқа тартылды.
Қыз ұзату тойына жиналған мына азаматтар мониторингтік топ өкілдері кіріп келгенде абдырап қалды. Сосын, есікке қарай жапатармағай қаша жөнелді. Жүз кісі қонақ тұрмақ, тойхана қызметкерлері де маскасыз. Карантин бұзылды, полиция тойды тоқтатты. Ал есіктерін ішінен құлыптап алған мына мейрамханаға тексерушілер кіре алмады.
ДАСТАН ҚАЗИЕВ, Петропавл қаласы кәсіпкерлік бөлімінің өкілі:
- Жұма күні үш, сенбі тағы төрт мейрамханадағы тойды тоқтаттық. Нысан қожайындарына әкімшілік хаттама толтырылды. Қазір той науқаны, 200-ге жуық адамды жинап той жасап жатқандар көбейді. Сондықтан, рейдтер апта сайын өткіземіз.
Тәулігіне мыңнан астам адам коронавирус жұқтырып, инфекциялық стационарлары 60 пайызға толған Алматыда да тығылып той жасайтындар тыйылар емес. Өткен демалыста қалада карантинге қарамай, құдалық пен туған күн өткізгендер әкімшілік жауапкершілікке тартылып, айыппұл арқалады. Сондай-ақ жұмыс режимін бұзып, әлеуметтік арақашықтықты сақтамаған ойын-сауық орындары да анықталды. Жалпы мегаполисте демалыс күндері карантинді бұзған 39 жағдай анықталды дейді мамандар.
Індет ушығып тұрған «Қызыл аймақтағы» Атырау облысында да тойханалар мен түнгі клубтар карантин талаптарына бағынар емес. Аймақта сенбі, жексенбі күндері қоғамдық тамақтану орындары, мейрамханалар мен кафелердің жұмысына тыйым салынған. Алайда, соған қарамастан, екі күн демалыста Атырау қаласының өзінде жүздеген адамға жасырын той өткізген жиырмаға жуық тойхана мен оннан астам түнгі клуб анықталды.
Руслан Жасұланұлы, Жанат Молдашова
Бізді әлеуметтік желіде оқыңыздар:
KZfaq - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#карантиндегі_той #ойын_сауық #ҚызҰзату