12+
Dörd novella-mahnıdan ibarət filmdə bir-birini əvəz edən dörd nəslin müxtəlif dövrlərdəki talelərindən bəhs olunur. Bir ailənin dörd nəslindən bəhs edən film, hər nəslin nümayəndəsini bir təbiət ünsürü ilə bağlı peşə ilə əlaqələndirir. Bağban (torpaq), balıqçı (dəniz), neftçi (od), təyyarəçi (səma).
İlk hekayədə müharibədən əvvəlki dövrdür. Dənizkənarı qəsəbələrdən birində baş verən əhvalatda torpağa sevgidən söz açır. Ailənin ağsaqqalı Kərim baba bar verməyən torpaqda usanmadan ağac əkir. Oğlu Əli isə atası faydasız işlə məşğul olduğuna görə onunla mübahisə eləyir. Balıqçılıqla məşğul olan Əli oğlu Kamili bağban kimi yox, balıqçı görmək istəyir.
İkinci hekayənin rəmzi dənizdir. Kamil artıq böyüyüb. O da atası kimi dənizə vurğundur. Amma balıqçı kimi yox, dənizdən neft çıxarmaq arzusundadır və bu arzusunun dalınca gedir.
Üçüncü əhvalat odla bağlıdır. Kamil rəssam Sevda ilə ailə qurur. Amma toy günü müharibə başlayır. Kamil müharibəyə gedir. Bu müddətdə oğlu Murad doğulur.
Nəhayət, dördüncü əhvalatın əsasında səma dayanır. Kamilin oğlu Murad artıq böyüyüb. O da öz arzusunun arxasına gedərək təyyarəçi olur.
İstehsalçı: Azərbaycanfilm
İlk baxış tarixi: 18.03.1968
Texniki göstəricilər: 35 mm, 21:9
Janr: dram
Mükafatlar:
1. Zaqafqaziya və Ukrayna respublikalarının II Zona kinofestivalı - uşaqlarla işə görə rejissora mükafat (1968, İrəvan)
Rejissor: Şamil Mahmudbəyov
Ssenari müəllifi: Anar Rzayev
Operator: Rasim İsmayılov
Rəssam: Nadir Zeynalov
Bəstəkar: Rauf Hacıyev
Rollarda: İsmayıl Osmanlı (Kərim baba), Ələddin Abbasov (Əli), Tamara Kokova (Gülsüm), Fidan Qasımova (Sevda), Ələsgər İbrahimov (Kamil), Kamran Rəcəbli (Kamil uşaqlıqda), Sevda Əliyeva (Solmaz), Cəmilə Məmmədova (Solmaz uşaqlıqda), Fikrət Əliyev (Murad), Vaqif İbrahimoğlu (Murad uşaqlıqda), Rafiq Tağıyev (Murad dayı), Əliheydər Həsənzadə (ovçu), Zemfira Sadıqova (Fatma)