張敬軒IG直播精華丨凌晨開直播搵林家謙Tyson Yoshi吹水丨講賣毛講粗口講音樂笑到肚痛丨田木集作
張敬軒aka軒公今日凌晨開IG Live同樂迷傾偈，解答吓人哋嘅生活煩惱，相信都有唔少歌迷心靈得到安慰。難得軒公顯靈，當然唔係只得自己歌迷受惠啦，Tyson Yoshi同林家謙嘅Fans們都好開心㗎，因為佢哋兩個都有加入個Live一齊傾。
軒公開解完幾個樂迷之後，就邀請Tyson Yoshi加入，首先多謝佢睇咗個Live咁耐，仲問點解可以睇咁耐。Tyson Yoshi就話：「見你開解人，諗住聽下有冇啲Topic可以Relate到，可以攞嚟寫歌，夜晚嘅一個沉澱過程。有時我覺得寫歌係同自己嘅探討，有啲嘢係平時自己唔為意，人哋講起，你諗嗰陣先發現，原來我好care呢樣嘢，跟住就攞出嚟寫。」
見到Tyson Yoshi，好多歌迷都想佢騷吓三上悠亞珍藏，不過佢就話啲收藏放咗喺Studio，仲特別講到：「嗰條毛唔係我㗎，我啲friend㗎，條毛好貴㗎，幾萬蚊㗎條毛。」軒公聽到之後都即刻話要諗出吓毛，不過Tyson就話覺得太變態喇，但軒公即時話睇吓邊度嘅毛，搵埋林家謙，三個人出返個，叫大家估呢三條分別屬於邊個，Tyson Yoshi一邊聽一邊笑到停唔到，有樂迷仲留言話林家謙躺着也中槍。
其間，Tyson Yoshi提到最近為出唔出碟而煩緊，因為佢已經出咗11隻Single，如果要Group埋做一隻碟，就覺得搞唔掂，因為11隻Single都冇故仔，Group唔埋。直播時，Tyson Yoshi成日唔小心爆咗粗，軒公都提醒佢有幾千人睇緊，唔好教壞小朋友，仲講返曾經俾903 DJ余迪偉喺大氣電波叫佢做張敬X：「佢嗰年喺廣州睇我演唱會，漏夜趕返香港第二朝同小儀做節目，佢原本係想講張敬軒喺廣州啱啱開完演唱會，但佢播歌之後就話恭喜晒『張敬Hi』，之後喺我啲Friend都係嗌我呢個名。」講完，軒公都不忘提醒Tyson Yoshi：「仆街仔，你唔好亂嗌呀！」
傾到凌晨接近兩點五十分左右，軒公發現林家謙都睇緊直播，即時邀請佢加入。家謙入直播嗰陣成個畫面都係黑色，話因為自己喺張床上面，所以唔可以開。但無耐佢又開咗少少燈，用手臂遮住自己塊面，被軒公笑佢話怕佢聽朝起身有肩周炎。之後家謙又攞咗Tyson Yoshi隻公仔嚟遮住自己，但係可能真係怕羞得濟啦，最後佢都係揀熄返燈。
佢哋三個喺直播又講返啲「毛」，軒公問佢哋邊個多毛啲，家謙答：「我唔知喎，問Christy（Tyson Yoshi女朋友）啦。」搞到軒公同Tyson Yoshi係咁嘩嘩聲叫，軒公即刻話家謙把口唔係省油的燈，「林家謙要寸你嘅時候真係招架唔到㗎」。
之後家謙講佢最近出碟好攰，「有一秒後悔呀，最近做到心灰意冷，發覺太多嘢要搞。Design或者其他所有嘢都複雜過舊年，原來舊年第一隻Smooth好多。」軒公大讚家謙新碟封面好靚，好襯佢，仲叫大家星期五出碟記得支持。聽到家謙怕賣唔到，軒公即時話：「點會賣唔到呀，癡線！」家謙解釋話唔知啲人對於出碟課金嘅意願有幾大，又唔知出碟啲人喺邊度聽，仲覺得啲人話買，但最後可能得一千幾百人，如果蝕錢係佢自己孭返。軒公同Tyson Yoshi都反駁佢，甚至叫佢唔好擔心埋一啲唔應該擔心嘅嘢，三個人最後傾到凌晨3點幾，軒公再繼續開解樂迷，一直到今晨5點幾先收台。
====================
更多《田木集作》嘅片，可以喺呢度睇到👇🏻👇🏻👇🏻
🛎️ YT： / 田木集作
🏃🏻 IG ： / touchwoodtv
❤️ FB： / touchwoodtv
====================
#張敬軒 #林家謙 #TysonYoshi #軒公顯靈 #張敬軒開Live #林家謙新碟 #田木集作 #田木 #touchwoodTV