Рет қаралды 1,459
Pensilvaniya shtatida AQShning sobiq rahbari Donald Trampga bir necha bor o'q uzib yaralagan, bir kishini o'ldirib, yana ikki kishini jarohatlagan shaxs 20 yoshli Tomas Mettyu Kruks ekani ma'lum. Uning o'zini xavfsizlik xizmati snayperlari shu zahoti otib o'ldirgan.
Tomasning yonida shaxsini tasdiqlovchi biror hujjat bo'lmagan. Xavfsizlik xodimlari uning shaxsini boshqa yo'llar bilan aniqlashga muvaffaq bo'lgan.
Federal Qidiruv byurosi bayonotiga ko'ra, u yolg'iz harakatlangan, otishmani sheriklarsiz rejalagan va amalga oshirgan. Hujumda qonuniy sotib olingan yarim-avtomat quroldan foydalangan.
Tergov boshlang'ich bosqichda ekan, byuro jinoyat motivlari bo'yicha javoblardan ko'ra savollar ko'pligini aytmoqda. Tomasning ruhiy kasalligi, siyosiy yoki g'oyaviy moyilligi, ijtimoiy tarmoqlardagi yozishmalari yoki yaqinlariga iqrorlari borasida biror arzigulik ma'lumot yo'q.
Tomas Pensilvaniya shtatida saylovoldi uchrashuvi o'tgan hududdan 70 kilometr masofada joylashgan Betel-Park shahrida yashagan. Saylov komissiyasida respublikachilar tarafdori sifatida ro'yxatdan o'tgan.