Рет қаралды 19,517
Shpallet fituesi i garës për ndërtimin, operimin dhe mirëmbajtjen e autostradës Lekaj-Fier. Ministria e Infrastrukturës, në përfundim të garës së hapur ndërkombëtare, ka shpallur fitues të këtij segmenti, bashkimin e 8 kompanive shqiptare të kryesuara nga kompania e ndërtimit Fusha.
Ky segment është i gjatë 46 km dhe është pjesë e Korridorit Adriatiko-Jonian. Ky koncension, sipas kësaj Ministrie, konsiston në transformimin e autostradës në një standard të ri, në të njëjtin standard me atë të segmentit Fier-Vlorë, ku parashikohet zgjerimi i saj në kategorinë B, mbyllja në të dy anët e saj me guardriela mbrojtëse, duke eliminuar hyrje-daljet vend e pa vend dhe aksidentet e shumta që kanë ndodhur deri tani nga këto hyrje-dalje pa kriter dhe pa standard në të gjithë gjatësinë e saj.
Gjithashtu, të gjitha rrethrrotullimet në segmentin Rrogozhinë-Lushnje dhe kryqëzimet në kuotë në segmentin Lushnje-Fier do të eliminohen tërësisht dhe për këtë është parashikuar transformimi i tyre në nyjë me standard si mbikalime apo nënkalime për automjetet dhe këmbësorët. Numri i këtyre veprave të reja mbikalimesh apo nënkalimesh, sipas projektit paraprak, llogaritet në rreth 20 të tilla në 46 kilometrat e saj. Projekti parashikon dhe ndërtimin e disa kilometra autostradë të re si rezultat i eliminimit të kthesave që nuk përshtaten me standardin e kërkuar, si dhe disa ura të reja përfshirë dhe atë mbi lumin Shkumbin për rrugën dytësore.
Për të realizuar ndërtimin me standard dhe sigurinë e autostradës, por njëkohësisht për të bërë të mundur lëvizjen e automjeteve të banorëve apo makinerive bujqësore të tyre, në të dy krahët e autostradës, në të gjithë gjatësinë e saj nga Lekaj deri në hyrje të Fierit, ky bashkim operatorësh do të ndërtojë rreth 90 km rrugë të reja me nga 2 korsi. Këto rrugë dytësore do të bëjnë të mundur lidhjen e zonave të banuara me njëra-tjetrën në të gjithë gjatësinë dhe nëpërmjet mbikalimeve do të lidhen me njëra-tjetrën të dy krahët e autostradës, pa patur nevojë të përdorin autostradën dhe duke eliminuar nevojën për të paguar nga ana e banorëve.
Burime të Ministrisë së Infrastrukturës theksojnë faktin se nga ky investim, asnjë banor nuk do të jetë i detyruar të paguajë për qarkullimin, në të gjithë gjatësinë e kësaj autostradë, pasi do të kenë gjithë infrastrukturën e re për qarkullimin nga Lekaj deri në Fier, nëpërmjet rrugëve paralele në të dy krahët e autostradës. Gjithashtu, parashikohet që pagesa për përdoruesit e autostradës do të vendoset vetëm pasi të jenë ndërtuar rrugët paralele dhe mbikalimet që bëjnë të mundur qarkullimin e të gjithë banorëve të zonave në të gjithë gjatësinë e kësaj autostradë.
Vlera që do të investojnë 8 kompanitë shqiptare do të jetë 320 milionë euro dhe do ta operojnë për 35 vjet për t’ia transferuar shtetit në përfundim të kontratës. Pagesa për kalimin në trupin e autostradës do të jetë 0,040 euro për kilometër dhe do paguhet për aq kilometra sa do të përdoret nga automjetet ndërsa automjetet që do ta përdorin në të gjithë gjatësinë prej 46 kilometrash do të paguajnë 1.84 euro. Transformimi i kësaj autostradë bashkë me ndërtimin e të gjithë rrugëve dytësore dhe veprave të artit, do të realizohet vetëm për 30 muaj, sipas propozimit të konsorciumit të 8 kompanive shqiptare.
Ndërkohë, Ministria e Infrastrukturës është në fazë shqyrtimi të ofertave të kompanive për ndërtimin e autostradës Kashar-Pezë-Lekaj me një vlerë investimi prej 475 milionë euro dhe të asaj Milot-Thumanë me vlerë 45 milionë euro, të cilat bashkë me koncensionin e Kashar-Thumanë që po ndërtohet nga kompania Gener 2, mbyll të gjithë gjatësinë me autostradë të kategorisë së lartë nga Miloti deri në Fier.
Tv Klan
#lekaj #fier #korridoriadriatikojonian
SUBSCRIBE to “RTV KLAN” on KZfaq for more videos!
Email: info@tvklan.al
Për më shumë informacione vizitoni faqen tonë web tvklan.al/
Videot e fundit nga Tv Klan i gjeni në faqen tvklan.al/video/
Follow Tvklan on Facebook: / tvklan
Follow Tvklan on Instagram: / rtvklan
Programet e Tv Klan mund t’i ndiqni edhe në faqen tvklan.al/prog...