'Upe 'o Latufuipeka - Tu'imala Kaho.
'Ai ange hano vala tau'olunga
Hano fakalala pe teunga kakala
Hono tuitu'u fakavahamapa
Ke fakame'ite kihe hau 'o Tonga
1. Tapu pea tulou moe taloni 'oe hau
Moe longolongo mo poto he laukau
Kau hūfanga he Toa ko Ma'afu
Koe talamonū mei Fangatapu
2. Lātūfuipeka kuo malu e tala
Taulamahao 'ae Langilau na
Uofulumātaha ta'u kuo ke ikuna
Ke monū'ia ai pe ho fononga
3. Kakala mo'onia 'oe 'api ko Vila
Pitenga e 'uhinga 'oe ngaahi ha'a
'Efinanga e ngaahi kie hingoa
Angina he vaha'a 'oe Ahi moe Vunga
4. Koe lolo ahi na'e fihiaki
Pea lote 'i Talikiha'apai
Mapu 'a Vaea kei touliki
Koe fangumalingi mei falelahi
5. Heilala ko Maki'ifakalavetala
'A Matangiake pea mo Kahoua
'Aikona e 'esi ko Taufa
Mapuna hake 'ihe Vai ko Puna
Koe lupehina 'oe fanga 'o Ata
'Oku kapapuna he 'one'one siliva
Malama hangē ha mahina
Mahiki pea hiva 'ae Taungapeka
Fakama'unga
'E Veitatalo pea mo Pouono
Kuo langimālie hotau 'aho
Kuo kapapuna he tahi loloto
Pea kuo longolongo tēvolo
Sukena 'ae matapā 'oe poto
'Ikai ha fifili 'ikai ha ofo
He koe huelo 'oe Pou'ao
Tuē pea mavava he fakamālō
BBA ko hono kakala
Fī pea haka he ano 'i Siniva
'Univesiti fakavaha'a Pule'anga
'I Suisalani hono papai fā
'Ai ange hano vala tau'olunga
Hono fakalala pe teunga kakala
Hono tuitu'u fakavahamapa
Ke fakame'ite kihe hau 'o Tonga