"Экспедиция" кўрсатуви
"Ўзбекистон тарихи" телеканали
Мингтепа археологик ёдгорлиги Андижон вилоятининг шарқий қисми, яъни ҳозирда Марҳамат туманининг марказида жойлашган. Мустақиллик сабаб ушбу қадимий тарихий ёдгорликни тарихчи ва археолог олимлар тадқиқиқ этишиб, ушбу харобалар қадим тарихий ёзма манбааларда қайд этилган Давон давлатининг маркази бўлган Эрши шаҳрининг харобалари эканлигини исботладилар.
Мингтепа шаҳри 70дан ортиқ қадимий ёдгорликлар, саккизта муқаддас қадамжо, юздан ортиқ шифобахш булоқларни ўз ичига олади.Унинг ҳудудида майдони 41,2 гектарни ташкил этувчи қадимий қалъа жойлашган. Фарғона водийсида эрамиздан аввалги IV-I асрларда мавжуд бўлган бой Довон давлатининг пойтахти ҳисобланмиш Эрши (кейинчалик Мингтепа деб номланган) шаҳри топилмалари туристларни ҳайратга солиши табиий.
Шаҳар ички ва ташқи қисмларидан иборат бўлиб, тахминан 40 гектар майдонни эгаллайди. Бу ерда олиб борилган тадқиқотлар ва қазилмалар давомида топилган ноёб осори-атиқалар, ҳунармандчиликнинг турли соҳалари - кулолчилик, тоштарошлик, темирчиликка оид моддий ашёлар қарийб 2,5 - 3 минг йиллик тарихга эга эканлигини кўрсатади.
Шаҳар харобаси эрамиздан аввалги IV-III асрларида пайдо бўлган Марказий Осиёдаги энг йирик шаҳар қолдиқлари ҳисобланади.