Рет қаралды 3,506
Hamiləliyimizin 25-ci həftəsinə gəlib çıxdıq. Dölümüz 750-850 q çəkiyə, 22 sm uzunluğa malikdir. Hamilənin qarnı artıq xeyli bəlli olur. Qarnın ölçüsü hamilə xanımlarda bir-birindən fərqlənə bilər. Bu, fizioloji quruluşla, əzələlərin möhkəmliyi, dölün duruşu və s. ilə əlaqəli ola bilər. Lakin əgər ultrasəsdə dölün ölçüsü və mayesi normal görünürsə, qarnın ölçüsünə görə narahat olmaq lazım deyil.
Döl yenə də aktiv hərəkət edir. Çünki özü hələ ki kiçikdir, ətraf maye isə çoxdur. Qaşları, kiprikləri əmələ gəlib, dərisi tüklərlə örtülüdür, lakin tüklərin piqmentasiyası hələ başlamayıb. Gözlərdə də hələ bu həftələrdə rəng formalaşmayıb. Artıq bu həftədən etibarən döl ətraf səslərə və işığa reaksiya verməyə başlayır. Üz cizgiləri formalaşır, anaya və ya ataya bənzədiyini yavaş-yavaş görmək olur.
Anaların qarın bölgəsində bəzən bu həftələrdə qaşınmalar başlayır. Bu da dərinin və əzələlərin dartılması ilə əlaqədardır. Bu səbəbdən də qıcıqlanma və ya qaşınma normaldır. Dəri çatlarının qarşısının alınması və qaşınmanın azalması məqsədilə hamilə xanımlara gündəlik olaraq səhər və axşam kokos və ya badam yağını qarın nahiyəsinə tətbiq etməyi, bol maye qəbul etməyi məsləhət görürük. Belə ki, bol maye qəbulu da dəri nəmlənməsinə və çat və qaşınmaların qarşısının alınmasına kömək edir. Əgər qaşınma keçmirsə, bu, müəyyən patoloji proseslərin göstəricisi ola bilər. Əgər hamilənin keçməyən, xüsusilə gecələr artan qaşıntısı varsa, mütləq həkimə müraciət etməlidir...
Beləliklə, hamiləliyin 25-ci həftəsində baş verən bu və ya digər dəyişikliklər barədə daha ətraflı məlumat almaq üçün videonu sonadək izləyin.