Hamiləlik marafonumuzun 29-cu həftəsindəyik? Nələr baş verir, hansı dəyişikliklər var?
Hamilələrimizdə bu həftələrdən etibarən şişkinliklər başlaya bilər. Bu şişkinliklər üzdə, əldə, ayaqda, bel hissəsində ola bilər. Onların hər birinin fərqli açıqlaması var. Əgər üzdə, beldə və əllərdə şişkinlik varsa, bu, ciddi bir böyrək problemindən xəbərdar edə bilər. Bu zaman mütləq böyrək funksiyasını araşdırırıq, böyrək ultrasəsi edirik, sidik analizi hamilələrimizdə onsuz da rutin olaraq izlənilir və vəziyyəti qiymətləndiririk. Ayaqlarda olan şişkinliklər çox zaman fizioloji səbəblərdən olur. Əlbəttə, hamilələrə müəyyən diskomfort verə bilər. Lakin adətən ciddi səbəblə bağlı olmur. Təbii ki, hamilənin təzyiqlə bağlı problemi yoxdursa. Əgər şişkinlik təzyiqlə paralel müşahidə olunursa, bu, hamiləliyin təzyiqi, preklamsiyanın bir əlaməti ola bilər.
Şişkinlikdən əziyyət çəkən hamilələrimizə oturan zaman ayaqlarını daha yüksək yerə söykəməyi, yatarkən ayağın altına yastıq qoymağı, gündəlik tez-tez ayağa qalxıb gəzişməyi, mümkün qədər idman hərəkətləri etməyi, axşam evdə sərin duş almağı tövsiyə edirik. Damar genişliyi və ya təzyiq problemli hamilələrə tam fərqli yanaşılır, fərqli həll üsulları tövsiyə olunur.
Bundan başqa, ana və atanın qan qrupu uyğunsuzluğu varsa, məhz 28-29-cu həftələrdə müəyyən kumbs analizi yoxlanılır və pasientə rogam iynəsi vurulur. Doğumdan sonra körpənin qan qrupu yoxlanılır və anayla uyğunsuzluq varsa, 72 saat ərzində təkrar rogam iynəsi pasientə vurulur. Bu iynə həm cari hamiləlik, həm də irəlidə planlaşdırılan növbəti hamiləlik üçün önəmlidir...
Beləliklə, hamiləliyin 29-cu həftəsində baş verən bu və ya digər dəyişikliklər, həmçinin qan uyğunsuzluğu və rogam iynəsinin önəmi barədə daha ətraflı məlumat almaq üçün videonu sonadək izləyin.