Wag ako
Mahal naaalala mo pa ba kung pano tayo nagsimula
Sa kung paanong ang ngiti sa ating mga labi ay di mabura bastat tayoy magkasama
Sa kung paanong ang yapos mo at halik ang gamot sa lahat ng sakit
Nagpapagaan sa lahat ng bigat na aking pasan
At bumubuo sa araw kong kulang kulang
Mahal naaalala mo pa ba ang bawat saya
Bawat away na ating nalampasan dahil mahal natin ang isat isa
Bawat luha na pareho nating pinunasan dahil di kita kayang mawala at ganon ka din diba?
Kaya nga tayo nagtagal
Kaya nga tayo nagtagal ng pansamantala
Pero mahal naaalala mo din ba nung una mo syang nakilala
Nung unang beses kayong nagkasama
Noong nag uusap kayo ng masaya na parang kayo lang dalawa
Na parang walang ako, walang tayo sa mundo nyo
Mahal naaalala mo pa ba ang una kong pag iyak nang dahil sa kanya
Malamang hindi
Malamang hindi, hindi dahil sa nakalimutan mo na o meron kang amnesia
Malamang hindi dahil pinilit kong ilihim ang sakit
Pinilit kong sarilihin ang pait ng selos at pagkainggit dahil mukang meron ng papalit
Mali mali, dahil mukang meron ng pumalit sa pwesto ko sayo
Hanggang sa hindi ko napigilan
Tinanong kita " may gusto ka ba sa kanya?"
Pero sabi mo, "ano ba? Kaibigan ko lang sya"
Mahal naman, hindi ako tanga
Hindi ako tanga para hindi malaman ang espesyal sa kaibigan lang
Hindi ako bulag para hindi makita ang saya sa iyong mga mata
Dahil tila may kakaiba pagdating sa kanya
Pero naniwala pa rin ako
Naniwala pa rin ako na wala lang lahat sa inyo
Ang pagtiis mo sakin na hindi ako kausapin habang kausap mo sya
Oo wala lang yon
Ang pagpupuyat mo gabi-gabi at pag abot nyo ng umaga sa pagkukulitan sa mga bagay bagay na pagkakapareho nyo pala
Oo wala lang yon
Ang pagbabahagi mo sa kanya ng paborito mong kanta habang sabay kayong nag aaliw sa musika
Oo wala lang yon
Wala lang lahat ng yon dahil gaya ng sabi mo
Kaibigan mo lang sya at ako ay hindi dapat mangamba
Siguro nga masyado lang akong malisyosa
Para pag isipan kayo ng hindi maganda
Kaya nais kong humingi ng tawad sayo at sa kanya
Patawad kung nasaktan ako noong nakita ko na mas kaya nya ang pasayahin ka
Patawad kung nagalit ako at nagselos noong nabubuo nya ang araw mo kahit magulo tayo
At patawad kung kinailangan ko nang sumuko sa laban ng pag ibig nato dahil alam kong ako na ang talo
At ngayon kung magbabago man ang ikot ng mundo
At isasabihin mong mahal mo pa ako
At itatanong mo sa akin kung pwede pa ba tayo
At hihilingin mong bumalik ako sayo
Pakiusap lang wag na ako
Kung pipili ka sa pagitan namin ng kaibigan mo
Wag ako
Wag ako hindi dahil sa mas kaya nyang pasayahin ka
Hindi dahil sa mas maganda sya
Hindi dahil sa mas matalino sya
O mas magaling sa larangan ng musika
Kung sa tingin mo na ang isa sa nakaraan mo ang bubuo sayo
Wag ako
Wag ako hindi dahil sa hindi kita kayang panindigan
Wag ako kahit sobra kitang pinaglaban
Wag ako hindi dahil sa hindi ko sya kayang tapatan
Wag ako hindi dahil sa hindi ko sya kayang higitan
Kung sa tingin mo meron kang isang taong kailangan pang ipaglaban
Pakiusap lang wag ako
Wag ako hindi dahil sa hindi ako si Basha sa second chance
O dahil sa hindi na kita gusto at ayoko na sayo
Wag ako
dahil hindi mo naman kailangan mamili sa'ming dalawa
Dahil kung ako talaga
Sa umpisa palang, ako lang sana
Wag ako
Dahil di mo naman ako dapat balikan
Dahil ako ang sumuko at nag iwan
Pero sana hindi mo ko binigyan ng dahilan
Wag ako
Dahil ayokong maging nakaraan muli sa iyong kinabukasan
Wag ako
Dahil ayoko nang mawasak muli sa parehong paraan
Ayoko nang umiyak sa paulit ulit na dahilan
Dahil kinaya ko na
Kinaya ko na ang mabuong muli ng sarili ko lang
Kaya mahal pakiusap ko sayo, wag ako.