Xətai rayonunda "TWINS Art MTK" tərəfindən tikilən binanın sakinləri mübahisə edir. Qonşular arasında narazılığa binanın idarəedilmə üsulu səbəb olub.
Sakinlər binada kommunal xərclərin yüksək olmasından, habelə göstərilən xidmətdən narazıdırlar. Binada generatorun, həyətyanı sahədə yaşıllığın, qarajda təhlükəsizliyin təmin edilməməsi kimi şikayətləri var.
2017-ci ildə "TWINS Art MTK" binanın sonuncu mənzilini də təhvil verərək, buradakı işini yekunlaşdırıb. Sakinlər narazılıq edir ki, buna rəğmən MTK əlini binadan çəkmir. Hazırki komendatlıq da onların nümayəndəliyidir.
Komendant Zakir Məmmədov isə sakinlərin iddialarını qəbul etmir. Onun oğlu, binanın mühasibi Cəfər Məmmədov özlərinin "TWINS Art MTK"-ya bağlı olmadıqlarını iddia edir.
Xətai rayon sakinlərinin dilləndirdikləri məsələlər ilə paytaxtda bir çox yaşayış məntəqəsində rastlaşmaq olar.
Daşınmaz əmlak bazarı üzrə ekspert Nüsrət İbrahimov mediaya açıqlamasında deyib ki, yeni tikilən binalarda qanun pozuntuları zəncirvari şəkildə davam edir: "Qanunda birmənalı olaraq yazılıb ki, tikilən binalar İstismar Qəbul Komissiyasına təhvil verilməlidir, sonra mənzillərə çıxarış alınmalıdır. 6 ay müddətində Mənzil Mükiyyətçiləri Müştərək Cəmiyyəti yaradılmalı (MMMC) və Ədliyyə Nazirliyindən qeydiyyatdan keçməlidir. Daha sonra yaradılan cəmiyyət binanın idarə etmə strukturunu, yığılan “ev pulu”nun miqdarını və qanunla müəyyən edilən digər məsələləri formalaşdırmalıdır. Bu proseslərin heç biri həyata keçirilmədiyi üçün vətəndaşlar hər addımbaşı qanun pozuntusu ilə üzləşirlər. Bir sözlə, MTK komendantları “bulanıq suda balıq tuturlar”.
Mövcud idarəetmədən narazı qalan sakinlər etiraza davam edəcəklərini deyirlər. Onlar sakinlərin imzalarını topladıqları şikayəti Ədliyyə Nazirliyinə ünvanlayacaqlar.