Рет қаралды 186
花蓮體中棒球隊欲20冬前,捌是木棒聯賽的大強隊,上強的戰績是季軍,更加栽培出陳俊秀、鄭鎧文,這寡職業棒球好手。不而過,人才流失嚴重,花蓮體中按怎對抗這寡挑戰,予學生囡仔會當留佇故鄉拍球,守護基層棒球?
球員楊佑安少棒時期是佇太巴塱國小,這間國小栽培出真濟棒球明星,親像王光輝、黃忠義等老輩選手。2017年楊佑安彼時,伊和其他隊友做伙六連勝,提著第8屆紅葉小巨人杯軟式少棒錦標賽冠軍。國中煞因為走偏去空白3冬,高中時代才閣開始拍球。
上蓋感謝的猶是阿媽,過去因為爸爸媽媽佇咧臺北上班,阿媽是照顧伊和姊姊、妹妹上重要的人。阿媽看伊國中三年按呢迷失家己,實在看袂落去,講重話:「若會無欲好好仔拍球?」這句話,予伊想真久,明明過去的就是遮爾愛棒球,若會放棄這條路咧?
楊佑安靠太巴塱國小教練陳明仁的幫助,順利進入花蓮體中棒球隊,閣共伊自偏離的路,閣搝轉來,算是影響伊真深的人。