Шымкенттегі Азат шағын ауданында қала әкімі Мұрат Әйтенов келгенде қосылған газ өңір басшысы кеткеннен кейін қайта өшірілген. Он жылдан бері талай атқамінердің алдын тоздырып, әрең жеткен көгілдір отынның қызығын небәрі 15 минут көрдік дейді халық. Бұған шамданған жұрт әкімдіктің есігін қағып барғанымен, ақ жағалылардың ешқайсысы жөнін айтпады деп ашулы.
Өткен айда ғана Шымкенттің әкімі Мұрат Әйтеновтің өзі азаттықтардың үйіне бас сұғып, тұрғындардың құтты болсын айтып шыққан еді. Бірақ жұрттың бұл қуанышы көпке ұзамай, көгілдір отын сол күні-ақ қайта сөніпті. Әкім Севара Шуманованың да шаңырағына кіріп, газын қосқан екен. Бірақ содан кейін табиғи газды көрмедік дейді. Есесіне, сығымдалған баллондағы газды жағып күнелтіп жатыр. Үйді жылытатын газ қазандығын да орнатқанымызбен күздің қара суығында қалтырап отырғандарын айтады.
СЕВАРА ШУМАНОВА, тұрғын:
- Газ келгеннен кейін қуанып, бала-шағамыз жылы үйде отырады екен деп қуанған едік. Қайда? Әкім үйден шықты да өшірді де, сомен қайтадан отырмыз қазір үйде дірілдеп. Бала-шағамызбен ауырып.
Осылайша 10 жыл күткен көгілдір отынымызды көзбояушылық үшін 15 минутқа жағып, қайта сөндірді деп налыған халық, әкімдіктің есігін қаққан. Бірақ сүйіншілеген шенеуніктер тұрғындардан теріс айналды дейді жұрт.
КӘМШАТ БЕКАУЫЛОВА, тұрғын:
- Неге бұл халықты алдайды әкім? Неге қостым дейді да қоспайды деп бардық. 19-қыркүйекте қабылдауына жазылдық. Бірақ, біз шақырылмадық.
Жауаптылар болса газдың шағын ауданға жеткізілгенін айтады. Ай басында ақау да туындапты. Ал қазірге тұрғындар құжаттарын газ таратушы мекемеге өткізіп, арнайы келісімшарт жасауы тиіс деп отыр.
МАҚСАТ ЕРДЕМБЕКОВ, Энергетика және инфрақұрылымды дамыту басқармасы басшысының орынбасары:
- Октябрьдің басында аварийный ситуация болды. Соларды бәрін қалпына келтірдік. Енді міне, Қазтрансгазбен түсініктеме жұмыстары жүріп жатыр. Енді 500 үйлердің 100 үйінің құжаттары дайын емес. Соны дайындап газға қосу керек.
Жауаптылардың сөзіне сенсек тұрғындар талапты орындаса, алдағы айда 520 абонент көгілдір отынмен толықтай қамтылмақ.
Мақсат Жақсыбайұлы
Бізді әлеуметтік желіде оқыңыздар:
KZfaq - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31