執法者們丨陳豪馬國明黃宗澤三大視帝集結 宣萱擔心同馬明感情線被質疑
出爐視帝陳豪、馬國明、黃宗澤、宣萱、吳啟華、蔡潔、劉佩玥、陳瀅、洪永城、陳敏之、羅子溢、梁競徽、胡鴻鈞、陳星妤同埋涂毓遴等人出席新劇《執法者們》開鏡拜神儀式。見到阿Mo呢身造型，就知佢今次係演律師，繼10年前喺劇集《法外風雲》演律師後，阿Mo已經有一段時間無拍呢類角色， 自己都非常期待，要講同法律相關嘅對白，阿Mo都話要啲時間準備同做定功課。今次佢就同宣萱有感情線，佢話自從上次合作後，已經有一段時間無見。
除咗同宣萱之外，阿Mo呢次同飾演警察嘅Bosco，以及飾演ICAC嘅馬明都有唔少對手戲，呢個鐵三角視帝組合破天荒合作，Bosco預告佢呢次啲打戲將會係三個當中最甘，佢講笑話同武指講可唔可以私人畀錢請多兩個替身，佢話編劇絕對係挑戰拍劇嘅預算，同埋劇集嘅尺度，因為佢睇住啲打鬥劇本，好懷疑係咪真係播到出街。早前Bosco拎大灣區視帝寶座，宣讀致謝詞時竟然漏咗多謝樂小姐，好彩佢落台後即時補鑊，而呢日佢講返自己嘅一時之失，都覺得好內㡱，仲話已經加約同跪地叩頭賠罪。
呢次宣萱同啟華再次合作，唔單止觀眾引頸以待，佢哋都話回憶返晒嚟，啟華話見到宣萱個法官樣，即刻記起宣萱喺《壹號皇庭》造型，宣萱就提議不如開《壹號皇庭》第十輯，身邊嘅啟華都好想，仲話要翻生，因為佢喺劇中嘅角色已經死咗。宣萱話今次會同阿Mo、馬明有感情線，佢話同阿Mo以前演過情侶所以唔擔心，反而馬明年紀細佢一節，不過啟華話絕對無問題，望落去都唔似大過馬明。
蔡潔呢次同Bosco既關係終於升呢做一對夫妻，不過佢哋呢一對就唔係甜甜蜜蜜，因為個劇一開始就離婚，之後每次見面都會嗌交，話雖如此，蔡潔就話自己好期待，因為同好友Bosco演過好多關係，但係首次演情侶，加上兩個人不時會掟啲好笑嘢出嚟夾吓。而阿Moon呢次喺劇中同競徽嘅感情線，一樣都係充滿波折，不過演ICAC高級調查主任嘅陳瀅，就爆阿Moon劇中嘅造型火辣，因為當日試造型時，阿Moon喺更衣帳篷度聽到出面啲人講，阿Moon嚟咗，畀啲性感衫佢試。阿Moon解釋因為陳瀅要著製服，啲衫會密實啲，而佢就比較清涼少少，兩位靚女嘅話題，搞到身邊嘅羅字溢面靈尷尬話不如離開先，唔知點加入話題，不過佢就話自己劇中會有好多衫著。
近年主攻內地市場嘅競徽，已經好耐無同香港嘅觀眾見面，佢話今次劇中同林嘉華演父子，係一位受過高等教育嘅人物，另外同阿Moon就係情侶關係。早前啱啱經歷喪母之痛嘅敏之，呢日強忍傷痛如常開工，敏之話媽咪嘅離開好難可以短時間內安撫到心情。佢話媽咪而家喺天上會睇住佢有冇努力工作同生活，當講到媽咪好鍾意睇佢嘅劇集時，敏之就開始雙眼通紅，佢話媽咪好鍾意睇佢直播，係佢最忠實嘅粉絲。所以知道媽咪唔想睇到佢唔開心，所以好希望拍好呢部作品等天上嘅亡母可以睇到。
#執法者們 #陳豪 #馬國明 #黃宗澤 #宣萱 #吳啟華 #蔡潔 #劉佩玥 #陳瀅 #洪永城 #陳敏之 #TVB #娛樂新聞 #TVB娛樂新聞台 #ENews #HKENews #香港娛樂八卦新聞 #八卦新聞
即刻Follow TVB 娛樂新聞台 Facebook專頁
/ tvbenews
登入myTV SUPER享受睇TVB自製節目7日包括娛樂新聞的免費點播
bit.ly/2TXLlM0