Зохиолч: Todko Samson
Уншсан:О.Эрдэнэбаяр Өнөөдөр би эх хүн. Алтан савандаа амь багтааж, амандаа маань шивнэж суух ээж хүн. Эмэгтэй хүн гэдэг ижийдээ үр нь, үрдээ эх нь, эр хүнд хань нь байдгаараа ертөнцийн төв байж мэднэ. Эсвэл энэ бүхнийг өөртөө багтаасандаа өөрөө ч ертөнц байж мэднэ. Тийм болохоор өргөс ихтэй орчлонгийн өнгө сайтай цэцэг бүхнийг хүсэвч, өрөвдөөд тастаж чадахгүй... үрээсээ, эрээсээ горьддог биз. Цэцэг усгүй үхдэг бол, цэрэг дайнд үрэгддэг бол, ээж хүн гэдэг үрийн төлөө өдөр бүр үхэж, үхлийг өдөр бүр өнжөөдөг байнам.
Тийм байхад өөрийнхөө хүүхдээс уучлалт хүсэх эх хүн өрөвдөлтэй. Ертөнц дээр үрдээ уучлагдсан эх хүн гэж байдаггүй юм шүү дээ. Энэ чинь үр нь уучилдаг хорвоо биш. Эх хүн, эмэгтэй хүнд битгий хатуурхаарай.
Би хоёр бурхан ярилцаж суухыг олонтаа харж байлаа. Чи ч гэсэн бишгүй их харна. Төрөхийн үнэнг чамаар, Үхэхийн үнэнг өөрөөрөө нотолж, үйлийн чинь үрийг цагаатгаж үрийнхээ төлөө үүр цайлгаж суух тэр бурхныг харна. Чиний төлөө нэг бурхан нөгөөгөөсөө гуйлга гуйж, чиний төлөө хоёр бурхан хоорондоо ярьж, уйлж суугаа нь тэр. Тиймээс эх хүнийг битгий загна, эмэгтэй хүнийг битгий хараа. Зарим нэгэнд нь харааж загнах байтугай харж суух нь ч алга. Амьдралын явдал учрын ээрэмд нэхэгдэж юу нь сайн, юу нь муу гэдгийг тунгааж амжаагүй байхад чинь, чиний бурхан тэнгэрийн бурхандаа одчихно. Дэлхийгээ дэрлээд унасан хойно нь чулууг нь хэчнээн тэврээд яах ч билээ. Амьдад нь хайрла. Амьдад нь....
Эх хүнийг, эмэгтэй хүнийг ширүүлж харах вий гэхээсээ ч эмээж яв. Лааны тос шиг урсаад өнгөрөх цаг хугацааг нь жамаас нь эрт бүү бөхөө. Цагийн цөвүүн хүний муу танигдахад чамд үлдэх цор ганц хүн бол чиний ижий. Насаа хурааж, буй бие нь үгүй болсон ч амьддаа өргөсөн цацлын сүү нь өлмийг чинь бат оршооно. Хүйтэн хорвоо хаалга цонхоо хааж, хүн бүхэн чиний эсрэг болоход анх амлуулсан ангир уураг нь аминд чинь дахиад нэг орно.
"Ээж" хэмээх алдар дээр өөр ямар ч зүүсгэл зүүгээд хэрэггүй! Угаас “ээж” гэдэг алдрыг давж гарах одон, ололт амжилт, шагнал цол, гавъяа гэж хаана ч байдаггүй юм!
Бүсгүй хүнийг бүтэн хайрла!