Bir yuz o'n bir oyatdan iborat bo'lgan bu sura Makkada nozil kilingan. Bu surada ham boshqa Makka suralarida bo'lgani kabi e'tiqod, Alloh taoloning yakka-yolg'izligi, qayta tirilish aniq ma'lumligi borasida so'z ketsa-da, undagi eng asosiy jihat payg'ambar Muhammad alayhis-salomning shaxsiyatlari va u zotga Alloh tomonidan ato etilgan mo''jizalar ta'rif-tavsifidir. Bu sura Alloh taolo O'zining so'nggi payg'ambariga ko'rsatgan «sayr» mo''jizasi haqida xabar berish bilan boshlanadi. Shu boisdan, suraning nomi «Al-isro» - «Tungi sayr» deb atalgandir.
Bu surada Bani Isroil qavmi xususida ham so'z yuritilib, ularning tug'yon va isyonlari hamda oxirat-oqibat topajak musibatlari haqida xabar beriladi. Shuning uchun ayrim ulamolar uni "Bani Isroil" surasi deb ataydilar.
Bu sura mo'minlarga yolg'iz Alloh taologagina ibodat qilishdan keyingi eng zarur amal ota-onaga yaxshilik qilish, ularning huzurida ta'zim-tavozu' bilan turish, buyurgan ishlarini quloq qoqmay bajarish ekanini uqtiradi. Yana bu surada borliqdagi jonli-jonsiz barcha mavjudot o'z vujudlari, o'zaro bog'lanishlari va bir tartib-intizomga so'zsiz bo'yinsunishlari bilan ularni yaratgan ham, boshqarib turgan ham yolg'iz Alloh taolo ekanligiga dalolat qilib turishi ta'kidlanadi.