અમેરિકાના ન્યૂ જર્સીમાં ટેમ્પરરી વર્કર્સને કાયદાકીય રક્ષણ આપવાનો કાયદો 07 ઓગસ્ટથી અમલમાં આવી ગયો છે. ન્યૂ જર્સીમાં મોટી સંખ્યામાં ગુજરાતીઓ પણ વસે છે અને નાના- મોટા બિઝનેસ કરીને સ્થાપિત થયા છે. નવા કાયદાથી ગુજરાતી સમુદાયના લોકોને પણ ફાયદો મળશે જેઓ કોઈને કોઈ ઉદ્યોગમાં હંગામી ધોરણે કામ કરે છે અને અત્યાર સુધી તેમને રેગ્યુલર એમ્પલોઈ જેવા રાઈટ્સ પણ મળતા ન હતા. અહીં મોટા ભાગની ઈન્ડસ્ટ્રીમાં કામદારોની હાલત બહુ ખરાબ છે તથા તેમને ઓછા પગારમાં કામ કરાવવાથી લઈને બીજા પણ ઘણા લાભો ન અપાતા હોવાની ફરિયાદો વર્ષોથી થઈ રહી હતી, ત્યારે હવે લાંબી પ્રક્રિયા બાદ સરકારે ટેમ્પરરી વર્કર્સના અધિકારોનું રક્ષણ કરવા માટે કાયદો લાગુ કર્યો છે. નવો કાયદો અમલમાં આવવાથી કામદારોના પગારમાં ભેદભાવ નહીં રહે અને કામકાજની સ્થિતિ પણ વધુ સુરક્ષિત બનશે. એક અંદાજ અનુસાર, ન્યૂજર્સીમાં લાગુ થઈ ગયેલા આ કાયદાને કારણે સવા લાખથી પણ વધુ ટેમ્પરરી વર્કર્સને ફાયદો મળશે. ટેમ્પરરી વર્કર્સ એટલે એવા વર્કર્સ કે જે કોઈ ફેક્ટરી, વેરહાઉસ કે પછી બીજી કોઈ જગ્યાએ કોઈ એજન્સી વતી કામ કરે છે. ન્યૂજર્સીમાં ઘણા અનડોક્યુમેન્ટેડ ગુજરાતીઓ પણ ટેમ્પરરી વર્કર્સ તરીકે કામ કરતા હોય છે, પરંતુ તેમને ઓછા પગારમાં વધુ કલાકો સુધી કામ કરાવાતું હોય છે અને ઘણા કેસમાં તો જગ્યા જોખમી હોય તો પણ ત્યાં તેમને વર્ષો સુધી કામ કરવાની ફરજ પાડવામાં આવતી હોય છે. એટલું જ નહીં, તેમની જોબમાં પણ કોઈ પ્રકારની ના તો સેફ્ટી હોય છે કે ના તો તેમને રેગ્યુલર એમ્પ્લોઈ જેવા ફાયદા મળતા હોય છે. જોકે, કોઈ અનડોક્યુમેન્ટેડ ઈમિગ્રન્ટ ભાગ્યે જ કામકાજના સ્થળ પર કરાતા અન્યાય સામે અવાજ ઉઠાવવાની હિંમત કરે છે.