અમેરિકાનું ગ્રીન કાર્ડ મેળવવાની કે પછી ત્યાંના સિટીઝન બનવાની પ્રોસેસ ખૂબ જ લાંબી છે, તેમાં વર્ષોના વર્ષો નીકળી જતા હોય છે. જોકે, આપણે ત્યાં ઘણા લોકો એવા પણ છે કે જેમની ફેમિલીમાંથી કોઈ એક વ્યક્તિ અમેરિકા ગઈ હોય, અને પછી આખી ફેમિલીને તેણે ત્યાં બોલાવી લીધી હોય. તેવામાં કોઈને પણ સવાલ થાય કે અમેરિકાનો સિટીઝન બની ગયેલો કે પછી ગ્રીન કાર્ડ ધરાવતો વ્યક્તિ ફેમિલીમાંથી કોને ત્યાં બોલાવી શકે, અને તેમના માટે ગ્રીન કાર્ડ માટે એપ્લાય કરી શકે? આ સવાલનો જવાબ મેળવતા પહેલા એક વાત સમજવી જરૂરી છે કે અમેરિકાની સિટીઝનશીપ અને ગ્રીન કાર્ડ બંને અલગ વસ્તુ છે, ગ્રીન કાર્ડ એક પ્રકારની પરમેનન્ટ રેસિડેન્સીનો પરવાનો છે, પરંતુ ગ્રીન કાર્ડ હોલ્ડર અમેરિકાના નાગરિક નથી ગણાતા, અમેરિકાની સિટીઝનશીપ મળી ગયા બાદ જ કોઈ વ્યક્તિ અમેરિકાના નાગરિક કહેવાય છે.