A CHILIMA AMWALIRA PA NGOZI YA NDEGE
Dziko la Malawi lili pa chisoni chachikulu pamene nzika zake zikulira kwambiri kamba ka ngozi ya ndege imene yatenga miyoyo ya anthu asanu ndi anayi (9) amene ndikuphatikizapo wachiwiri wa mtsogoleri wa dziko lino a Saulos Klaus Chilima. Ndegeyi imene inanyamula anthuwa inagwa dzulo pa 10 June 2024 ku dera lotchedwa Nthungwa mu nkhalango ya Chikangawa m’boma la Mzimba. Mtsogoleri wa dziko lino a Lazarus Chakwera ndi amene alengeza ndikuwuza mtundu wa a Malawi pazakumwalira kwa a Chilima ndi anthu ena amene anali nawo mu ndegeyo masana alero pa 11 June 2024. Mukuyankhula kwawo, a Chakwera amene amanveka ndikuwoneka kuti ali ndi chisoni chachikulu, apempha anthu mdziko muno akhale pa umodzi a bata pa nthawi yovuta ngati imeneyi.
A Chilima amapita ku Mzuzu kuchoka ku Lilongwe komwe amati akapitilira kupita m’boma la Nkhatabay kumene amayenera kukakhala nawo pa mwambo woyika mmanda a Ralph Kasambara amene anamwalira ku mapeto kwa sabatayi. Komatu za chisoni, nyengo ya chifunga inakakamiza ndege ya asilikali ankhondo adziko lino kuti ibwelere ku Lilongwe itakanika kutera pa bwalo la Mzuzu ndipo kuchoka apo, akulu akulu owona za ma ulendo a pandege ku Mzuzu ko sanathenso kuyankhula nayo ndegeyo.