بسم الله الرحمن الرحيم
(لَقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ لِمَنْ كَانَ يَرْجُو اللَّهَ وَالْيَوْمَ الْآخِرَ وَذَكَرَ اللَّهَ كَثِيرًا) صدق الله العظيم
بەڕێزان زانایان و پێشەوایانی پایەبەرز..
ئامادەبووانی بەڕێز..
سڵاوی خودای گەورەتان لێ بێت..
جێگەی شانازیمە کە ئەمڕۆ بەشدار دەبم لەگەڵتان لە یادی لەدایکبوونی پێشەوای موسڵمانان و سەروەری مرۆڤایەتی حەزرەتی محەممەد (د.خ)، لە مزگەوتی ئیمامی ئەعزەم ئەبو حەنیفەی نوعمان (خودای گەورە لێی رازی بێت)، لە بەغدای پایتەختی شارستانیەتی ئیسلامیی، لە بەغدای رەسەنایەتی و مەڵبەندی كەلتووری مرۆڤایەتی و جوامێریی، لە بەغدای خۆشەویستی و ئاشتی، ئومێد دەكەم ئەم شارە بگەڕێتەوە سەر رۆڵە شارستانییەتەكەی خۆی و تەنگژە و قەیرانەکان تێپەڕێنێت و درەوشاوەتر لە جاران باوەش بۆ جیهانی مرۆڤایەتی بکاتەوە.
ئەمە بە رێككەوت نییە كە ھەردوو مەڵبەندی ئاینیی ئەعزەمیە و كازمیە دراوسێی یەكترن، ئەوان دووانەیەكی لێكدانەبڕاوی بەغدای پایتەختن، مەڵبەندی لەگۆڕنانی فیتنە و ئاشوب و پشێویین، لانکە و مەڵبەندی بەهاكانی خۆشەویستی و پێكەوەژیانن، ھێمای یەكڕیزی و برایەتی و تەبایی عێراقییەكانن، فاكتەری یەكسانی و لێبوردەیی نێوان پێكهاتەكانی گەلەكەمانن.
خوشك و برایان..
لەم بۆنە گەورەیەدا كە یادی لەدایکبوونی پێشەوای موسڵمانانە (د.خ)، پێویستە پەند و ئامۆژگاریی وەرگرین و ئەم یادە بکەینە بنەمایەك بۆ لێبوردەیی و پێكەوەژیان.. پێغەمبەری مەزن (د.خ) دەوڵەتی دامەزراند، لەو دەوڵەتەدا توانی کۆتایی بە ستەم و گەندەڵی بھێنێت و دادپەروەریی بچەسپێنێت و بەھا مرۆڤایەتییەکان بەرز راگرێت، لە ئاکاری جوان و هێزی ئیرادە و دادپەروەری و بەزەیی و، ئاشتیخوازیی كردە دروشمی خۆی كە سەرچاوەكەی ئەم ئایەتەی قورئانی پیرۆزە كە دەفەرموێت (وَمَا أَرْسَلْنَاكَ إِلاّ رَحْمَةً لِلْعَالَمِينَ).
رۆژی لەدایکبوونی پێشەوای موسڵمانان (د.خ) بۆنەیەکی گەورە و گرنگ و پەیامبەخشە بۆ بەرجەستەکردنی ئاشتی و خۆشەویستی و پێکەوەژیان لە نێوان سەرجەم مرۆڤایەتی، ھەربۆیە ئەمڕۆ لە ھەمووکات زیاتر پێویستمان بە چەسپاندنی بەھا و رەفتارە جوان و بەرزەکانی پێشەوای موسڵمانانە، تاوەکو بەھا بەرزەکانی ئاینی پیرۆزی ئیسلام بەرز راگرین، با لە پێغەمبەری خودا (د.خ) فێری چاکەخوازیی بین.
ئیسلام بەهاكانی لێبوردەیی و پێكەوەهەڵكردن و ئاشتی بۆ گەلانی جیهان هێنایەئاراوە، تەنانەت سڵاوكردنیشی بە وشەی ئاشتی دەست پێكرد، بەهای پێکەوەژیانی ئاشتییانە و میانەڕەویی چەسپاند، هەروەك خودای گەورە لە قورئانی پیرۆزدا دەفەرموێت: (وَجَعَلْنَاكُمْ شُعُوبًا وَقَبَائِلَ لِتَعَارَفُوا.. إِنَّ أَكْرَمَكُمْ عِندَ اللَّهِ أَتْقَاكُمْ).
پەیامی ئەم ئایەتە پیرۆزە بۆ خەڵكی ئەوەیە كە مرۆڤەكان ھەموو لە یەك بنەچەوە ھاتوون و لە سەریان پێویستە کە زەوی ئاوەدان بكەنەوە و یەكتربناسن و لە پێناو چاكەخوازی و خواپەرستیدا هاریكاریی یەكتر بكەن و خۆشیان لە ستەمكاری و دوژمنكاری و پەرتەوازەیی بەدوور بگرن.
گرووپە توندڕەوەكان لەوەدا شكستیان هێنا كە خۆیان بكەنە دەمڕاستی ئاین و بە ناوی ئاینی پیرۆزی ئیسلامەوە پاساو بۆ كار و كردەوەكانیان بھێننەوە و ھەوڵە نەزۆکەکانیان لەبارچوون، كە ویستیان لەکەی تیرۆر و توندڕەوی بدەنە پاڵ موسڵمانان.
گرووپە توندڕەوەكان، موسڵمان و غەیرە موسڵمانی ئەم جیهانەیان كردنە ئامانج، ئەگەر ئاوڕێکیش بدەینەوە، دەبینین کە زیاتر موسڵمانان بوونەتە قوربانیی تاوانە قێزەونەكانیان.
لە بەرەنگاربوونەوەی تیرۆردا و توندڕەوییشدا، موسوڵمانان پشكی شێریان بەركەوتووە، بەمەش دەیسەلمێنن كە ھەموو پابەندی بنەما جوانەكانی ئیسلامن بۆ رەتكردنەوەی ستەمكاری و كوشتنی خەڵكی بێتاوان، لەم بارەیەشەوە خودای کاربەجێ فەرموویەتی: (مَن قَتَلَ نَفْسًا بِغَيْرِ نَفْسٍ أَوْ فَسَادٍ فِي الْأَرْضِ فَكَأَنَّمَا قَتَلَ النَّاسَ جَمِيعًا).
ئامادەبوانی بەڕێز...
لە کاتێکدا كە یادی ئەم بۆنە گرنگە دەكەینەوە، وڵاتەكەمان بە دۆخێكی ناهەمواردا تێدەپەڕێت و لە لێواری هەڵدێراندایە.. یان دەبێت بگەڕێینەوە ناو بازنەی پەرتەوازەیی و ململانێ ناوخۆییەكانمان، یاخود بە ویستێكی پۆڵایینی یەكگرتووەوە رووبەڕووی ئاڵینگارییەكانمان ببینەوە و خزمەتی هاووڵاتییان بكەین.
ناسەقامگیریی؛ نیشتمان و گەلەکەمان بێهێز و لاواز دەكات، دەرگای دەستوەردانی دەرەكی واڵا دەكات، عێراق دەكاتە گۆڕەپانێك بۆ ململانێی ئەوانی دیكە، عیراقییەكانیش بە گیان و سامانی خۆیان باجی ئەو ململانێیە دەدەن.
گومان لەوەدا نییە كە پێویستە کەموکورتی و هەڵەكانی رابردوومان تێپەڕێنین، چونکە ئەم دۆخەی ئێستا چیتر مایەی قەبوڵكردن نییە، سیستەمی حوكمڕانی لە ناو خولگە و بازنەی تەنگژەكاندا دەخولێتەوە، هاووڵاتیانی ناڕازی لە بەسڕە و زیقاڕ و ئەنبار و بەغدا و موسڵ و ھەرێمی كوردستان، بە روون و راشكاوی دژ بەم دۆخە ناهەموارە هاتوونەتە دەنگ.
تاكە بژاردە و چارەسەریش ئەوەیە چاكسازیی بونیاتنەر لە سیستەمی حوكمڕانییدا بكەین، پێكهێنانی حكومەت زۆر دوا کەوتووە، ماددە دەستوورییەکان پەك خراون، بژێوی ژیانی هاووڵاتییان و خزمەتگوزارییەكان تا دێت خراپتر دەبن، ھەربۆیە ناكرێت چی دیكە گرەو لەسەر دانبەخۆداگرتنی هاووڵاتییان بكەین، عێراقییەكان لەم دۆخەی ئێستا رازیی نین و شایستەی ژیانێكی باشترن.
.......