Алматыдағы перзентханалардың бірінде босанған келіншек көз жұмған. Марқұм келіншектің туыстары қайғылы оқиға дер кезінде көмектесе алмаған дәрігерлердің салғырттығынан болып отыр дейді. Айтуларынша, Ақбота ә-дегеннен-ақ жамбасым шыдатпай ауырып жатыр деп шағымданған. Алайда, ақ халаттылар босанған әйелде болатын симптом деп жылы жапты дейді марқұмның туыстары. Тек жағдайы ушығып, жансақтау бөліміне түскенде ғана дәрігерлерді шақыра бастаған екен.
Мейрамбек пен Ақбота осыдан үш жыл бұрын шаңырақ көтеріпті. Екі жыл бұрын алғашқы сәбилері дүниеге келген. Жүктілік кезінде де, босанғанында да ешқандай қиындық болмады дейді Мейрамбек. Бұл жолы да ай-күні жетіп толғағы қысқан соң перзентханаға әкелген. Арада бірнеше сағат өткенде екінші ұлы өмір есігін ашыпты. Бірақ, таудай қуанышымның ұзаққа бармайтынын білмедім дейді. Өйткені, келесі күні әйелі жамбасы ауырғанын айтып шағымданған екен. Ал, ақ халаттылар Ақботаның жағдайы ушыққанда ғана қозғала бастады дейді.
МЕЙРАМБЕК ДОСАН, марқұмның күйеуі:
- Біз екі аяқпен кіріп мына жаққа, екі аяқпен күлімсіреп кеткенбіз. Бүгін босанады, бүгін бәрі жақсы болады, Алла қаласа деп. Сондай үмітпен келгенбіз. Біз артынан қайғылы жағдаймен денесін алып шықтық моргтен. Сонда №4 больницаға жібергеніне не себеп, біз білмейміз. Неге жібергендерін. Мына жақта сонда УЗИ-лары жоқ па, рентгендері жоқ па? Бізде маман жоқ дейді. Ол қалай?
Марқұмның енесі келінім үш тәулік ұйықтамады деп отыр. Айтуынша дәрігерлер онсызда жаны қиналып, аяққа тұра алмай тұрған әйелді жеңіл көлікке отырғызып, ауруханаға апарған екен.
ҮМІТ ӘБІЛДАЕВА, марқұмның енесі:
- Даже анализ де алмаған. Даже мача да алмаған. Температура, давлениесін өлшемеген өзі босанып жатқан әйелдің. Оказывается бұ да қан айналымы болмай жатқан. Қан айналымы болмай жатқан адамның жамбасын байлайды. Одан қинап бандажды кигізеді.
Үміт дұрыс диагноз қоя алмаған ақ халаттылар мәйітті де тым кеш берді деп отыр. Өйткені, дене мәйітханаға жеті сағаттан соң жеткізіліпті. Сол үшін көңілдеріне күдік ұялаған. Ал перзентхана өкілдері сараптама жұмыстары тағайындалды дейді.
ЗӘУРЕ ДАТХАЕВА, №4 Перзентхана директорының міндетін атқарушы:
- Төртінші күні жағдайы күрт нашарлап кетті. Біз науқасқа ережеге сай тексеріс жүргізіп, емдеуге тырыстық. Бірақ, біз жасаған ем көмектеспеді. Жағдайы нашарлай берді. Енді бәрі сот сараптамалық зерттеуден кейін белгілі болады.
Демек, келіншектің нақты неден көз жұмғаны сараптамадан соң ғана белгілі болады. Сәйкесінше, қызметтік тексеріс те содан кейін басталуы мүмкін. Ал, аман апарған жарынан аяқасты айырылып қалған отағасы жазықтылардың бәрі жазалануын қалайды. Әрі, жұмыстан шеттеліп қана қоймай, сотталуға тиіс деп отыр.
Бізді әлеуметтік желіде оқыңыздар:
Информбюро 31 / @informburo31kanal
Informburo kz / @informburokz2022
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
Біздің сайт: www.31.kz және www.informburo.kz
Біздің WhatsApp +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал