#demədidemə #azerbaycan #mixək
Mixəyin sağlamlığa faydaları
Yəqin hamının evində mixək var. Etiraf edirəm ki, onun insan sağlamlığına faydaları haqqında mən də çox şey bilmirdim. Buna görə, azacıq da olsa, araşdırmağa ehtiyac duydum. Bu videoda hər gün 1 mixək qəbul edildikdə, yaxud çeynəndikdə nələr baş verəcəyi haqqında danışacağam.
Mixək təbiət möcüzəsidir desək yanılmarıq. O, insan orqanizminə olduqca faydalıdır. İndiyədək mixək haqqında çox sayda elmi araşdırma aparılıb. Ağrıkəsici xüsusiyyəti ilə, yəqin ki, çox adam tanışdır. Diş ağrısı zamanı ağızda çeynəmək, yaxud ağrıyan dişin dibinə qoymaq kimi bir üsulu tətbiq edənlər rəylərdə yaza bilərlər.
Mixəyin tərkibində evgenol adlı bir maddə var. O, xüsusi aromasını və özünəxas dadı məhz evgenoldan alır. Mixəkdə insan orqanizminin ehtiyac duyduğu bir çox bitki mənşəli maddələr də mövcuddur. Ümumiyyətlə, təbii otlar və ədviyyatlar istifadə edildikdə orqanizmə vitaminlər, minerallar kompleks şəkildə daxil olur.
Mixəyin faydaları
Mixəyin malik olduğu faydalı xüsusiyyətlər, əslində, onun yaşam mübarizəsi üçün yaratdığı mexanizmlərdir. Bəli, bitkilər də daim təhdid altındadırlar. Mixəyin düşməni mikroblardır. Bu səbəblə onun güclü antimikrobial xüsusiyyətə malik olması sizə təəccüblü gəlməsin.
Ağzında candida yəni göbələk varsa, mixək çeynəmək kifayət edir. Mixək çeynəmək dişlərin üzərindəki ərp yığıntısının qalınlığını azaldır, diş əti xəstəliklərinə müalicəvi təsir edir. Ağız boşluğunun sağlamlığını arzulayanlar mixək yağından, yaxud mixəyin özündən istifadə etsələr, yaxşı olar.
Təbii ki, mixəyin təkbaşına hansısa xəstəliyi müalicə etməsini iddia etmək düzgün deyil. Hətta mixək çeynəməyə başlamamışdan qabaq həkim məsləhəti almanız daha məqbuldur. Nə də olsa, hər orqanizm fərqlidir və hər bir vasitə-istər bitki mənşəli olsun, istər heyvan mənşəli, istərsə də kimyəvi,-orqanizmə individual təsir edir.
Baş dərisindəki göbələkləri, yaxud hər hansı patogenləri yox etmək istəyənlərin də mixək yağına üz tutduqları məlumdur. Orqanizmdə göbələk infeksiyası varsa, toksikləşmə prosesinin başlaması, yavaş da olsa, irəliləməsi labüddür. Mixək bu zaman da orqanizmin ən yaxın dəstəkçisinə çevrilir; toksikləşmənin müddətini və həcmini, irəliləmə sürətini azaldır.
Mixək yağının Helicobacter pylori ilə mübarizə apardığı da elmə məlumdur. Qeyd edim ki, Helicobacter pylori mədənin və onikibarmaq bağırsağın müxtəlif nahiyələrinin selikli qişasında aşkar olunan spiralşəkilli, qrammənfi patogen bakteriyadır. Mədə xoralarına, qastritlərə səbəb olur. Mixək Helicobacter pylorinin fəaliyyətinə mane olur, xoraları, qastriti, həzmsizliyi, qazı, köpü aradan qaldırır.
İltihab əleyhinə xüsusiyyəti ilə mixək artritdən əziyyət çəkənlər üçün əlçatan vasitədir. Ağciyər xərçəngi başda olmaqla, bir çox xərçəng növlərinin əmələ gəlməsinə mane olur.
Tərkibində mixək, yaxud mixək yağı olan pəhriz proqramı II tip diabet xəstəliyinə tutulma riskini azaldır. Mixək qəbulu qanda şəkərin səviyyəsini nizamlayır, insulin ifrazını artırır, insulinlə əlaqədar olan hüceyrə funksiyasını yaxşılaşdırır.
Mixək sümüklərin sağlamlığı üçün də faydalıdır; osteoporozun meydana çıxmasına mane olur. Qadın orqanizmi osteoporoza qarşı daha həssasdır. Yaş artdıqca sümüklərinin qayğısına qalmaq hər bir insanın borcudur. Mixəkdəki manqan sümükləri gücləndirir. Təbii şəkildə qəbul edilən manqan sümüklərin böyüməsinə, sümük sıxlığının artmasına və illər boyunca sağlam qalmasına kömək edir.
Sarımsaq və soğan kimi qidaların istifadəsindən sonra ağızda xoşagəlməz iyin qarşısını almaq xüsusiyyəti var. Yeməkdən sonra mixək çeynəmək kariesdən qoruyan ən təsirli vasitələrdən biri hesab edilir.
Təzəliyini və keyfiyyətli olmasını yoxlamaq üçün bir neçə ədəd mixək 1 stəkan suyun içərisinə atılır, suyun dibinə batması və ya mayenin içərisində üzməsi onun keyfiyyətinin yüksək, yana çevrilərək suyun üzərində qalması isə köhnə və yararsız olduğunu göstərir.
Mixəyin zərərləri və əks təsirləri
Bəribaşdan qeyd edim ki, sadalayacaqlarım mixəyin özündən çox, yağına aiddir. İndi isə tərəziyə çıxın və kilonuzu dəqiqləşdirin. Sonra da çalışın ki, gündəlik qəbul etdiyiniz mixək yağı norması orqanizmin çəkisinin hər kiloqramına görə, 2,4 milliqramı keçməsin.
Lakin müəyyən hallarda dozanı azacıq artıra bilərsiniz. Sadəcə, normanı həddən artıq aşmağa çalışmayın ki, qaraciyərdə toksikləşmə prosesi başlamasın.
Mixək bəzi orqanizmlərə allergik təsir edir. Məhz bu səbəbdən, qəbul etməzdən əvvəl, həkim məsləhəti almağınız yaxşıdır.
Hamilə və süd verən qadınlar mixək istifadə etməməlidirlər.
Sizinlə həmişə evinizdə olan bir vasitədən-mixəkdən danışdım. Hindistanda və Çində mixəyin istifadəsinin tarixi 3 min il əvvələdək uzanır. Onun müalicəvi faydaları haqqında çox öyrənilib və öyrənilməkdədir. Əminəm ki vieomuz sizing üçün faydalı oldu. Bu kimi videolarımızın davamını görmək istəyirsinizsə, kanalımıza abunə olmağı, videolarımızı bəyənməyi unutmayın. İzlədiyiniz üçün təşəkkürlər.