2020 йилги Токио олимпиадаси яқинлашар экан, унда
ўзбекистонлик спортчиларнинг иштироки қандай бўлади, деган савол мухлисларни қийнай бошлайди. Аввало, Ёзги Ўйинларнинг лицензияларини қўлга киритиш ва унга тайёргарликни кучайтириш зарур.
Бугунги кунда Ўзбекистон миллий олимпия қўмитасининг маълум қилишича, терма жамоамиз ҳисобида 11 та олимпиада лицензияси мавжуд. Уларнинг 3 таси октябрь ойининг иккинчи ўнкунлигида қўлга киритилди. Тошкентда ўтган енгил атлетика бўйича Ўзбекистон очиқ чемпионатида Светлана Радзивил 1,96 см баландликка сакраб Токио олимпиадаси нормативини бажарган бўлса, Германиянинг Штутгарт шаҳрида ўтган спорт гимнастикаси бўйича жаҳон чемпионати якунига кўра Расул Абдураҳимов илк бор ва Оксана Чусовитина саккизинчи марта Олимпия ўйинларида иштирок этиш имкониятига эга бўлди.
Бугун эътиборингизга ҳозирча қадар 7 та олимпиадада қатнашиб Гиннеснинг рекордлар китобидан расман ўрин олган спортчимизнинг ушбу ўйинлардаги иштироки кетма-кетлигини тақдим этамиз.
1975 йилнинг 19 июнь куни Бухоро шаҳрида таваллуд топган Оксана илк бор 1992 йил Испаниянинг Барселона шаҳри мезбонлик қилган олимпия ўйинларида иштирок этди. 17 ёшли қиз барча машқларни аъло даражада бажариб жамоавий олтин медални қўлга киритди.
1996 йил. АҚШнинг Атланта шаҳри. Ўзбекистон мустақил давлат сифатида илк бор ёзги олимпия ўйинларида ўз спортчилари билан иштирок этмоқда. Оксана Чусовитина мамлакатимиз тарихидаги илк олимпиячилар қаторида ушбу мусобақаларда иштирок этди. Гарчи, жаҳон чемпионатларида ўша пайтлар энг юқори натижа қайд этиб келган бўлсада, ушбу ўйинлар унинг учун омадсиз келди.
2000 йил Австралиянинг Сидней шаҳри мезбонлик қилган Ёзги олимпия ўйинлари Оксана учун учинчиси эди. Собиқ Олимпиада чемпионининг ҳаётида ўша йиллар оғир дамлар бошланганини спорт мухлислари яхши билишади.
Шундай бўлсада, иштирокчилар орасида энг ёши каттаси бўлган Оксана Чусовитина мусобақада муносиб иштирок эта олди.
2004 йилги Афина Олимпиадаси олдидан Оксана Чусовитина Анахаймда ўтган жаҳон чемпионатида олтин медални қўлга киритди. Бу эса унинг Ёзги ўйинларда фаворитлигини билдирарди. Бироқ, бу сафар ҳам Оксана мусобақани медалсиз тарк этди.
Илк бор немис мураббий қўли остида Чусовитина 2008 йилги Пекин олимпиадасида иштирок этди. Бу пайтга келиб унинг муаммолари ортга чекинган, бор эътиборини спортга қарата бошлаганди. Пекин ареналари қаҳрамонимизда кумуш медални тақдим этди.
2012 йилги Лондон олимпиадасида ҳам Оксана Чусовитина гарчи энг катта ёшли гимнастикачи деб эътироф этилган бўлсада, медаллар учун даъвогарлар қаторига киритилганди. Нафақат ўзининг севимли йўналиши - таяниб сакраш, балки, спорт гимнастикасининг бошқа турларида ҳам ёш иқтидор эгаларига муносиб рақобат қила олди.
2015 йил Бокуда ўтган жаҳон кубогида таяниб сакраш бўйича олтин медални қўлга киритган спорт гимнастикаси фахрийси Оксана Чусовитина Рио олимпиадаси иштирокчилари сафидан жой эгаллади. Бразилиядаги ўйинларга муносиб тайёргарлик кўрган Оксана мусобақанинг финалчилари қаторига кирди ва якунда еттинчи ўринни эгаллади. Бу унинг еттинчи олимпиадаси эди. Бунга қадар бирор спортчи олимпия ўйинларида бунча кўп иштирок этмаган. Буни Халқаро олимпия қўмитаси ҳам, Гиннеснинг рекордлар китоби жюрилари ҳам эътироф этишди.
Еттита олимпиада, олимпиада ва жаҳон чемпионатларининг энг юқори пробали медаллари, Гиннес рекордчиси, “Дўстлик”, “Меҳнат шуҳрати”, “Эл-юрт ҳурмати” орденлари соҳибининг ёши 40 дан ошди. Бу нафақат 22 ёш фахрий ҳисобланадиган спорт гимнастикасида, балки, спортнинг барча ҳаракатли турларида катта ёш ҳисобланади. Лекин, Чусовитина навбатдаги олимпиада сари ўзида куч ва ирода топа олди. Унинг тимсолида Ватан учун фидойилик, метин ирода ва матонат, ғалаба учун курашни кўриш мумкин. Штутгартдаги мусобақалар якунида Халқаро Гимнастика федерацияси томонидан Оксана Чусовитинанинг олимпиада лицензиясига эга бўлгани ҳақидаги хабар дунё жамоатчилигининг ҳайратига сабаб бўлди.
2020 йилги Токио олимпиадаси яқинлашмоқда. Оксана эса Ўзбекистон учун медални қўлга киритиш илинжида тайёргарликни давом эттирмоқда. Бу йўлда унга саломатлик ва омад тилаймиз.
Эслатиб ўтамиз, ҳозирча ўзбекистонлик атлетлар орасида икки нафардан эшкак эшувчи ва спорт гимнастикачиси, бир нафардан енгил атлетика, велопорт ва теннис вакили, шунингдек, тўрт нафар курашчи Олимпиада йўлланмасига эга. Яқин орада бу рақамлар ортишига умид қиламиз.