Түркістан облысы Түлкібас ауданында бірнеше елдімекеннің халқы осы өлкеде құрылысы қолға алынғалы тұрған цемент зауыты мен химиялық кешеннің салынуына қарсы. Жүзге жуық тұрғын талабын айтып, құрылыс алаңына жиналды. Олар қос өндіріс қолға алынса, бес бірдей ауыл жұртының тынысы тарылады деп шырылдайды.
Шағымдарын айтып шырылдаған бес ауылдың тұрғындары Цемент зауыты мен химиялық кешеннің құрылысына түбегейлі қарсы. Және бір ауыздан тура осы төңіректегі карьердің де жұмысын тоқтатуды талап етті. Айтуларынша, айналадағы ауылдарға зиян келуде.
БОЛАТБЕК ҚҰРМАНОВ, Түлкібас ауданының тұрғыны:
- Карьерде аптасына 3 мәрте жарылыс болады. Жарылыстан бүкіл шаң біздің ауылға прямой ауылға барады. Діріл оның үстіне. Бір-ақ каналымыз бар. 6-7 ауыл су ішеді. Қазір сол суға талас. Су 30-40 процент төмен деңгейге түсіп кеткен. Майда-шүйде бұлақтарымыз бар еді, ол бұлақтардан қалған жоқ.
Тек табиғатқа ғана емес, тұрғындардың денсаулығына да кері әсер етіп жатыр дейді жиналған халық.
БАҚЫТБЕК НҰРСЕЙІТОВ, Түлкібас ауданының тұрғыны:
- Әр көшеде 10-15 ДЦП бала бар, қанша жүрек ауруы бар. Басқа ауруларды санамағанда. Черепной давление туылып жатыр, вообще өліп кетіп жатыр. Ол ауру қайдан шығып жатыр, адамның өмірі қысқарып жатыр.
Екі зауыттың құрылысы қызу жүріп жатыр деген халық, қалың қауым жиналғанда ғана уақытша тоқтайды дейді.
Ал инвесторлардың айтуынша, екі зауыт салынса, мұнда жылына 1 миллион тонна цемент және 120 мың тонна поли винил хлорид өндіріледі екен. Дегенмен, бұл әзірге жоба күйінде тұр деген өндіріс басшылығы қазір құрылыс алаңында карьерге қатысты ғана жұмыс жүріп жатыр деп ақталды.
БОЛАТ ЕСТЕМЕСОВ, Зауыт директорының орынбасары:
- Бұның барлығы, жобасы дайын болған кезде алдарыңызға келіп, есеп береміз. Қазіргі атқарылып жатқан жұмыстар бұл тек қана карьерге қатысты жұмыстар. Темір жолдың расширениясы болып жатыр.
Құрылысқа қарсы шыққандарға әкімдіктегілер келіп басу айтып, мәселені облыс әкіміне жеткіземіз деді. Дегенмен, тұрғындар талабымызды орындатпай тынышталмақ емес. Бес бірдей ауыл жұрты инвесторлар құрылысты тоқтатпаса, арызымызды Президентке арқалап барудан тайынбаймыз деп отыр.
Мақсат Жақсыбайұлы, Руслан Тілеубердиев
Бізді әлеуметтік желіде оқыңыздар:
KZfaq - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#дау #экология #карьер #наразылық #Шымкент