Рет қаралды 132,473
Алматыдағы бүлік кезінде ішкі істер департаментіне 9 сағатта 27 рет шабуыл жасалған. 5 қаңтар күні қаладағы жаппай тәртіпсіздік кезінде, шамамен кешкі сағат 6 жарымда шеруге шыққандардың арасында мыңнан аса азамат аудандардағы ішкі істер бөлімдерін басып алмақ деген ақпарат тараған соң, «Қамал» жоспары жарияланған. Шабуылдаушылардың көздегені - қару сақталған қойма болды дейді полициядағылар. Департаменттегі қарулы қақтығыс кешкі 8-де басталып, таңғы 5-ке дейін созылған. Ғимаратты қорғау кезінде қанша полицей жарақаттанды? Нешеуі көз жұмды? Маңайдағы тұрғындар аман ба? Өмір Серікбекұлы біліп келді.
Алматыдағы жаппай тәртіпсіздікті ұтымды пайдаланған бүлікшілердің басты мақсаты - ішкі істер департаментін басып алу болды дейді полицейлер. Лаңкестердің бір тобы аудандардағы бөлімшелерге шабуыл бастаған сәтте, қару асынған мыңнан аса азамат дәл осы жерге келіпті.
ӨМІР СЕРІКБЕКҰЛЫ, Тілші:
- Полицейлердің сөзінше ішкі істер департаментіне 27 рет шабуыл жасалған. Әсіресе, ғимараттың мына бұрышы қатты зақымданыпты. Бұзақылар шабуыл кезінде бірнеше топ болып, арнайы жоспар бойынша жұмыс істеген. Алдымен олар айналадағы бейнебақылау камераларын сындырған, қақтығыс кезінде оларды қару-жарақпен қамтамасыз етіп отырған топ болыпты.
Жоспарларын қағазға жазып алуы мүмкін деген қалалық полицейлер шабуылдаушылар департаменттің төрт жағынан кірмекші болды дейді. Олар қарудың нақты қай жерде тұрғанын білген екен. Жол талғамайтын және жүк көлігімен есікті бұзбақшы болыпты.
САЛТАНАТ ӘЗІРБЕК, Алматы қаласы Полиция департаментінің ресми өкілі:
- Автомат, граната сияқты оқ-қаруларды пайдалана отырып, осы полиция департаментінің ішіне кірмекші болған. Абырой болғанда ол жоспарлағаны іске асқан жоқ. Бұл енді өте жақсы дайындалған адамдар.
Жалпы, жаппай тәртіпсіздік кезінде 185 полиция қызметкері жарақат алыпты. Оның екеуінің жағдайы ауыр болса, 3 тәртіп сақшысы көз жұмған. Полиция ғимаратына қарсы орналасқан тұрғын үйдің адамдары қатты шошып қалған. Көз алдымызда соғыс басталғандай болды дейді олар. Ауладағы бірнеше көліккке "қаңғыған" оқ та тиіпті.
Қақтығыс кезінде, қарумен шабуыл жасаған 20-дан аса адамның көзі жойылды. Департаментті басып алмақшы болғандар, жарақат алған жақтастарын өздерімен бірге алып кеткен екен. Қазір ғимараттың маңына мынадай блок бекеттер қойылған. Олар 19-шы қаңтарға дейін тұрады.
Өмір Серікбекұлы. Ринат Абулхаиров
Бізді әлеуметтік желіде оқыңыздар:
KZfaq - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#террорлық_акт #Алматы #шабуыл