5 жылдан соң елімізде шетелдік банктер мен сақтандыру компаниялары өз филиалдарын аша бастайды. Бұл туралы бүгін Сенатта өткен комитет отырысында Экономикалық интеграция жөніндегі министр Жанар Айтжанова мәлімдеді.
Оның айтуынша, бұл Қазақстанның Дүниежүзілік сауда ұйымына ену бойынша орындайтын талаптардың бірі.
Сондай-ақ бүгін депутаттар Қазақстанның Маракеш келісіміне қосылуын қарастырды. Бұл құжат Дүниежүзілік сауда ұйымына мүше болуына мемлекеттің құқылы екенін білдіреді. Мароккода 1994 жылы қабылданған тарихи келісімге Қазақстанның қосылуы туралы хаттамаға осы жылы Женевада қол қойылды.
Айта кетерлігі, Дүниежүзілік сауда ұйымына ену, бірлескен кәсіпорындар құру, зияткерлік меншік нысандарын алмастыру, экономиканың түрлі салаларына жаңа технологиялар мен инвестициялар тарту үшін зор мүмкіндіктер ашады. Хаттама күшіне енген күнінен бастап Қазақстан Дүниежүзілік сауда ұйымының мүшесі болып табылады.
Жанар Айтжанова, ҚР Экономикалық интеграция істері жөніндегі министрі
-Қаржы нарығы бойынша біз шетелдік банктер мен шетелдік сақтандыру компанияларына өздерінің филиалдарын ашуға Қазақстан тікелей сауда ұйымына өткеннен кейін 5 жылда рұқсат беретін болады. Ол шетелдік банктердің өздерінің капиталдары 20 млдр АҚШ доллары құрауы керек. Және сақтандыру компанияларына 5 млрд АҚШ долларын құрауы керек. Осы шарттаға сәйкес келетін шетелдің компаниялары біздің нарықта тікелей филиалдарын ашуға рұқсат етіледі.