Рет қаралды 1,011
Өр ауылым - Қызыл-кесік!
Қызылтастың бауыры Қызыл-кесік,
Даласына құт қонған, Қызыр көшіп.
Бесіктегі ұлдары батыр болып,
Бұрымдыға айналар қызың өсіп.
Үзілмеген тектілік тамыр әлі,
Ел деп шырқар сал-сері, саңылағы.
Би Боранбай, Шәкі Би, Шал қажының,
Мына, Дала мәңгілік шаңырағы!
Бұл, Далада Қубастың ізі қалған,
Тәңірі жар xалқына, түзі қорған.
Шаршы топты шаңдатып келетұғын,
Еркежирен қарасын үзіп алдан.
Майлышаттың маңайы май қараған,
Майда желі маңдайдан аймалаған.
Доланқара күнгейі, теріскейі,
Кем түсер айтыңдаршы қай даладан?!
Қандышоқы, Қарашаш, Бостандағы,
Табиғат-ай, Тасбұлақ, Баспандағы,
Мысықұя, Шетбоғас, Ақшоқыдан,
Қиял шіркін сан рет аспандады.
Егінбұлақ, Шона мен Жылыбеттің,
Жайсаң жерін жаныма жылу еттім.
Мүрсәлім, Әбіш, Қуан, Дәуітбайдың,
Тариxы да тереңде, жүріп өттім.
Құлыбай, Қожагелді, Жағалбайлы,
Тойқұлғанда топ арқар самалдайды.
Алақ, Еспе, Тақас, Арап алқаптары,
Ерекше тылсымымен жан арбайды.
Жұртыбай, Аюбайдың айналасы,
Жатып-ақ семіреді қой баласы.
Тұяқбай, Мәмбет, Ортабаз, Бағали да,
Бабалардың аманат, бай даласы!
Мойылды, Сарыбұлақ сағасында,
Сыр бөлек Сауытқойған даласында.
Ақтөбет, Қатжан, Құлыбай, Найзатастың,
Бір керемет жұпар бар ауасында.
Боғас жарып ағады ауыл ішін,
Жағасы жанға раxат xалық үшін.
Алыстағы ағайын осы жырмен,
Мауқын басып алсыншы, сағынышын...
© Мерей Қарт
#Ақсуат #Қызылкесік