Жыл басындағы санақ бойынша ел территориясында 295 мың бас киік болса, олардың тең жартысынан астамы көктемде қырылған еді. Ауыл шаруашылығы министрлігі өкілдерінің айтуынша, дала жануарларының өлімін анықтайтын құрылымдар әлі нақты жауап қатпай отыр.
Бетбақдалаға жасаған баспасөз туры басында дала жауһарларының бағытын білдік. Олар көктемдегі жағдайдан кейін әлі есеңгіреп жүр. «Киелі жануарлар әбден үркіп қалған», - дейді мамандар. Сондықтан әзірге шағын үйірмен дала кезуде.
Білім және ғылым министрлігіне қарайтын институттар мен шетелдік ғалымдар ақбөкендердің қырылу себебін ала жаздай зерттеді. «Алайда оның нәтижесімен бөлісуге асықтай отыр», - дейді Ауыл шаруашылығы министрлігіне қарасты мекеме басшылығы.
Саят Дүйсетаев, «Охотзоопром» ӨБ» РМҚК Орталық аймақтық филиалының директоры
-Өлген киіктердің пробаларын ғылыми органдар алған. Өкінішке орай солардан әлі жауап алған жоқпыз. Біз әрі қарай қалай жұмыс жасаймыз?
Білім және ғылым министрлігіне қарасты институт болса: «Біз дала жануарларының қырылу себебін анықтадық. Тіпті Үкімет деңгейінде өткен кеңесте мәселені айттық», - деп ағынан жарылды. Олардың сөзіне қарағанда, киіктердің өліміне кенелер кінәлі.
Абылай Сансызбай, Биологиялық қауіпсіздік ғылыми-зерттеу институтының бас директоры
-Миграционный киіктер өтетін жолдарда кенелер бөкенді шағып, сол пастереллез ауруының болуына себеп болды деп таптық.
Ауыл шаруашылығы министрлігіне бұл жауап жетпеген сыңайлы. Немесе екі ірі ведомство арасында кері байланыс болмай тұр. Дегенмен киіктердің қауіпсіздігіне жауап беретін инспекторлар өз қызметтерін жоспарға сай атқарып келеді.