Камал Әлпейісова - адамдар арасындағы қарым-қатынас, қоғамдағы түйткілді мәселелер турасында батыл үн қата алған, өзіндік стилі қалыптасқан жазушы. Қаламгердің «Бақыт пен елес» әңгімесінің де негізгі тақырыбы осы ауқымды қамтиды.
Кез келген ұлттың өзіндік рухани танымы, дәстүр-салты, наным - сенімдері, қағидаттары болады. Қазақ халқының да өзіне ғана тән құндылығы, танымы бар. Соның бірі - «ұрпақ жалғастығы» ұғымы. Тереңіне бойлап, жікке бөліп айтпасақ та, бұл тақырыптың мән-маңызын әрбіріміз ұғынамыз. Алайда К.Әлпейісова өз әңгімесінде бұл тақырыпты өзге қырынан танытады. Қаламгер «ұрпағымның жалғасы» болады деген ұлдың соңынан кетіп, өз отбасынан баз кешкен, күңгірт жолға түсіп, шын бақытынан адасқан кейіпкер тағдыры арқылы қоғамға ой тастайды.
Сонымен қатар автор әңгімеде адамзатқа кісілік қасиеттен айнымауды, қолындағы бар бақтың қадіріне жетуді насихаттайды.