மீன் அமிலம் தயாரிப்பு மற்றும் பயன்படுத்தும் முறை
மீன் கழிவுகளை பயன்படுத்தித் தயாரிக்கப்படும் மீன் அமிலம் என்பது அமினோ அமிலங்களையும், நைட்ரஜன் சத்தையும் கொண்ட ஒரு சிறந்த பயிர் வளர்ச்சி ஊக்கியாகும். மீனில் உள்ள புரதங்கள் நுண்ணுயிர்களால் செரிக்கப்பட்டு அமினோ அமிலங்களாக பிரிகின்றன. இந்த அமினோ அமிலங்களில் நைட்ரஜன் சத்து (தழைசத்து) நிறைந்துள்ளது. மீன் கழிவுகள் கிடைக்காத பட்சத்தில் முழு மீன்களையும் பயன்படுத்தலாம். எனினும் முழுமீனை விட மீன் கழிவுகளில் இருந்து தயாரிக்கும் மீன் அமிலம் சிறப்பாக உள்ளது.
தேவையான பொருட்கள்
1, மீன் கழிவுகள் அல்லது மீன் - 5 கிலோ
2, நாட்டு சர்க்கரை - 5 கிலோ
தேவையான உபகரணங்கள்
10 கிலோ கொள்ளளவுள்ள மூடியுடைய பிளாஸ்டிக் வாளி - 1
செய்முறை
பிளாஸ்டிக் வாளியில் 5 கிலோ அளவிற்கு மீன் கழிவு அல்லது மீன் எடுத்துக்கொண்டு அதனுடன் 5 கிலோ அளவிற்கு நாட்டு சர்க்கரையை சேர்த்து நன்றாக கலக்கியபின் காற்று புகாதவாறு மூடி நிழலில் வைக்கவும். 30 நாட்களுக்கு பின்பு மீன் கழிவுகள் நன்றாக சிதைந்து தேன் போன்ற ஒரு திரவமாக மாறியிருக்கும். இதுவே மீன் அமிலம் ஆகும்.
கவனிக்க வேண்டியவை
மீன் அமிலம் தயாரிக்கும் வாளியை கட்டாயமாக காற்று புகாதவாறு இறுக்கமாக மூடிவைக்கவும், தேவைப்பட்டால் மூடியின் மேல் ஒரு பாலித்தீன் சீட் போர்த்தி இறுக்கமாக கட்டவும். சூரிய ஒளி படாதவாறு நிழலில் பாதுகாத்து வைக்கவும். மீன் வாசனைக்கு நாய்கள் வரும் என்பதால், நாய்கள் வரமுடியாதவாறு பாதுகாப்பாக வைக்கவும்.
பயன்படுத்தும் முறை
10 லிட்டர் நீரில் 100 மி.லி மீன் அமிலம் கலந்து பயிர்களுக்கு தெளிக்க வேண்டும். 200 லிட்டர் நீரில் 2 லிட்டர் மீன் அமிலம் கலந்து பாசன நீரிலும் கலந்து விடலாம்.
பயன்கள்
மீன் அமிலம் 75 சதவீதம் வளர்ச்சி ஊக்கியாகவும், 25 சதவீதம் பூச்சி விரட்டியாகவும் செயல்படக் கூடியது.
மீன் அமிலம் தெளிக்கும் போது பயிர்கள் நன்கு பச்சைபிடித்து வளரும். வரப்பு மற்றும் வேலி ஓரங்களில் தெளித்தால் மயில், முயல் மற்றும் எலி தொந்தரவு தெளித்த ஐந்து நாட்கள் வரை இருக்காது, தேவைப்பட்டால் மீண்டும் தெளிக்கலாம்.
பயன்படுத்தும் காலம்
மீன் அமிலத்தை 3 ஆண்டுகள் வரை நிழலில் வைத்து பாதுகாத்து பயன்படுத்தலாம்.
செய்யக்கூடாதவை
மீன் அமிலம் கொடுக்கபட்ட அளவு மட்டுமே பயன்படுத்த வேண்டும், அதற்கு மேல் பயன்படுத்தினால் பயிர்கள் வாடிவிடும்.