Бәріңізге ассалаумағаликум. Санасын тұрмыс билеген, баласын орыс мектебіне сүйреген ата-аналар көбейіп барады. Жетпіс жыл қазақтарды қан шеңгелінде ұстаған көршіміз Ресей болса бізді әлі де тәуелді ұлт санап, шекарадан бергі жаққа тас лақтыруын тоқтатпай келеді. Ал орыстың тәрбиесін алып, ұлтқа қызмет ете алмай жатқандар жетерлік. Бірі ұлттық экономика министрі Әсет Ерғалиев. Қазақшасын көрсең қаның басыңа шабады.
Міңгір-міңгір еткен министрден айтқаныңды түсінетін Ақтөсің мың артық. Орыс десең-түрі жоқ, қазақ десең-тілі жоқ шенеуніктер қашанғы тайраң басып жүре береді? Оларға Германияға кеткен мына кісі не деп видео сәлем жолдады? Бұ кісінің тілім-тілім болған тіліміз жайлы айтқанын сіз тыңдадыңыз ба? Жүрсін Ерман Президенттің қазақшасына қандай сын айтты? Алаш арысы Темірбек Жүргенов «неге орысша сөйлемейсің» деп бұлқан-талқан болған орысты қалай орнына қойды? Мұндай сұмдық ақпараттарды сізге білген дұрыс.
«Күшігінде таланған - төбет кезінде де қорқады» демекші біз қатты жалтақпыз. Жағымпазбыз. Жағымпаз болғанымыз сонша орыстан қорқып өз тілімізді түрмеге қамап, орыс тіліне бостандық беріп қойдық. 30 жыл бұрын тәуелсіздік алған Қазақстаннан әр елге кеткен өзге ұлттар барған елінің тілін бір жылға жетпей үйреніп алған. Ал өмір бойы Қазақстанда тұрамын деген өзге ұлттар мен орыстілді қазақтар қазақтың тілін үйренген жоқ. Осыны көріп қатты күйінген Германияға кеткен бір тәтеміз видео сәлем жолдапты. Қазақша емес орысша сөйлген. Соры қайнаған өкіметіміз бен билікте отырған мәңгүрттер естісін деді ау. Айтқанын мұқият тыңдап көріңізші.
Қарап отырсаң Қазақстан ғана қазақ тілді және орыс тілді етіп, елді екіге бөлу саясатын жүргізіп отыр. 30 жыл бойы мемлекет ретінде Мемлекеттік тілді міндеттеуге түк істемеді. «Мемлекеттік тіл» туралы заңды қабылдамай қойды.
Бізде ғана бар шығар банкоматына «қазақша тіл таңдамаңыз, банкомат істемей қалады» деп жазып қоятын. Тағы бір қаныңды қарайтатыны біздің шенділер үлкен жиындарда бір ауыз қазақша амандасқаннан соң «бәріңізге түсінікті орыс тілінде жалғастырайын» деп көзі бақырайып, беті бүлк етпей тұрады.
Ал ақын Жүрсін Ерман елдің бәрін қазақша сөйлету Президент Тоқаевтың қолында тұрған шаруа дейді. Бұл туралы ол Нартай Аралбайұлына берген сұхбатында айтты.
Біз алаш арыстарының аманатын аяқасты еттік. Нақтырақ айтқанда қазақ билігі өз тілін өз қолдарымен тұншықтырып жатыр. Мұндайда Темірбек Жүргенов сияқты батыр, батыл тұлғаларымызды сағынасың. Ол кісіге қатысты композитор Брусиловский жазып қалдырған мына бір әңгімені естіппе едіңіз?!
"Темірбек Жүргенов өз кабинетінде мәжіліс өткізбек болды. Шамамен алғанда отыз шақты кісі жиналды, ішінде тек екі адам -қарағандылық Б.Н Орлов және мен орыс жұртынан едік. Наркомның өзі де басқа сөйлеушілер де тек қазақ тілінде сөйлеп отыр. Бір кезде Борис Николаевич орнынан тұрды да Жүргеновтен қазақша сөйлемеуін өтінді, мұнда не жайында әңгіме болып жатқанын өзі ұқпай отырғанын, сөйлеушілерді ол түсінетіндей болу үшін орысша сөйлеу жөн екенін айтты. Бір кезде Жүргеновтің қара көздері ұшқындап кетті. Жұрттың бәрі бүкшие түсіп, тым-тырыс бола қалды. "Сіз қайда отырсыз Орлов жолдас! Сіз қайда жүрсіз, өзіңіз!" деп Жүргенов дауысын бұрынғыдан да бетер қатайта сөйледі: "Сіз Қазақстанға келдіңіз екен, егер де мында жұмыс істегіңіз келсе, сіз республиканың мемлекеттік тілін білуге міндеттісіз! Сіз қазақ әндерін де орыс тілінде зерттемекшісіз бе?» деп орнына жайғасты.
Жарықтық, Жүргенов бір ғасыр бұрын бекер ерте туған екен. Қазіргі заманда өзге ұлтты сүзгілей қоймас, алайда қасқайған қазақ тілін аяқ асты еткізбесі анық еді. Бәлкім,бір жағынан ертерек кетіп қалғаны да дұрыс болған шығар."Тәуелсіз елдің" өзі өзекке тепкен мемлекеттік тілінің аянышты күйін көрмей көрде жатқаны. Тіл деп шырылдаған Шахановты "жындыға" теңеген қоғамдық сананың өзінде "психикалық тұрғыда ауытқушылық" бар сияқты. Келісесіз бе? Сіз үшін білген дұрыс!