#โฮมบุญคุณเฮือน [[ #ต้นฉบับผู้ประพันธ์ ]]
#ขึ้นบ้านใหม่2567
ขับร้องโดย
ผัดไท กมลชนก
พอใจ ปฏิมา
หมอลำตั้ม ณัตพล
หมอลำเอ พงษ์ศักดิ์
หมอลำอ้อมใจ ปิยวรรณ
เจ้าของผลงาน
ผัดไท กมลชนก
Guide Vocal
พิมพ์ พรทิพย์
ครูตื๊ก
คำร้อง/ทำนอง
ครูข้างถนน
ดนตรี/เรียบเรียง
Tik Drummer SoundThai
Graphic By แซ็ค หลานยายแหม่ม
#โฮมบุญคุณเฮือน (ขึ้นบ้านใหม่) เนื้อร้อง
[ร้อง]
ลูกสาวกก: หวัดดีจ้า พ่อแม่ แม่นหยังกันแท้ คือขบวนแห่ บักใหญ่
น้องสาว : หวัดดีจ้า พี่สาวใหญ่ เดินทางมาไกล เอื้อยเมื่อย บ่น้อ… เพิ่นสิขึ้นบ้านใหม่
ลูกสาวกก : ห๊า!! แม่นบ้านผู้ได๋ หลังใหญ่ แท้นอ
พ่อ-แม่ : เฮือนเฮานี้ล่ะเนาะ ลูกสาวเอย ที่เจ้าส่งเงินมา…มาลูกอย่ารอช้า ฟ่าวมาม่วน ขบวนขึ้นบ้านใหม่…
โห่…3 ที [เข้าสู่พิธีการแห่รอบบ้าน]
ร้อง
มาเด้อแม่ มาแห่ขึ้นบ้านใหม่ ฟ่าวมาไวๆ เชิญมาแห่อ้อมเฮือน รอบ1 บูชาพระพุทธ พระผู้วิสุทธิ์ ให้ปกป้องบ้านเรือน รอบ 2 บูชาพระธรรม ให้เป็นคองค้ำ คอยย้ำ คอยเตือน รอบ3 บูชาพระสงฆ์ รัตนตรัยดำรงค์ มั่นคงบ่แชเชือน ก่อนขึ้นบ้านใหม่ซุบ้าน กล่าวสัคเคฯ วอนวาน จากนั้นจั่งแห่ อ้อมเฮือน หอบสาด ถือหมอนซ่อยกัน หาบกะต่า แบกของซ่อยกัน เจ้าของบ้านว่านั้นให้อุ้มพระขึ้นเรือน เด้อ เอ้า อิพ่อ หมอธรรม ดำเนินพิธีกรรม ขึ้นบ้านใหม่ ก่อนเข้าเฮือน…
หมอธรรม)ฮอดแล้วตั้วบ้านเลขที่ 99 หนิ มีเจ้าของบ้านบ่น้อบ้านนี้ มามิดจี่ลี่ แท้น้อย
เทวดา) ฮ่วยแม่นไผล่ะนั่น ไปจั่งได๋กัน คือได้มา พี่น้อ
หมอธรรม) ได้ยินเพิ่นขานต้านต่อ ว่าเฮือนบ่อนนี้ แม่นเมืองมั่นขันทอง บ่มีหม่องสิจน เค้าส่าจ้นๆ อยากสิวนมาจอง อยากเห็นเฮือนงามเฮืองฮอง หาบข้าว หอบของ มาโฮมต้อน คูนเฮือน
เทวดา) หม่องอื่นมี คือบ่ไป
หมอธรรม) เพิ่นว่าพระอินทร์แต่งไว้ แต่หลายปีหลายเดือน มีสุข คนอยู่เหย้า เฝ้าเรือน เงินทองเต็มบ้าน จั่งพาหลานมาหา [เนี่ย!!]
เทวดา) เอ้อ…เว้า บ่ผิดจักแนว มาเห็นกันแล้วคิดเห็นจังได๋หนา
หมอธรรม) นี่แหละเฮือน ผุข้า!! แนมประตูแนฝา ตามหามาหลายปี
(โอ้ยหาบักโดนเพิ่งมาพ่อนิ)
เทวดา)เอ้า คันว่าเฮือนเจ้า บอกมาดู้ว่าเฮือนหลังนี้ มีชื่อว่าจั่งได๋
ดนตรี
หมอธรรม)พูด… เสาต้นนี้ ชื่อว่าท้าวบุญเงิน บันไดขึ้นชื่อว่าท้าวองอาจ แป้นกาดชื่อว่าท้าวบุญเย็น ฝาลายเซ็นแม่นท้าวสัตย์ซื่อ ดั้นกะยัวขื่อชื่อว่าท้าวคำแดง เครื่องระแนงชื่อท้าวอาฬมัย อกไก่ชื่อท้าวบุญโฮม ปั้นลม ชื่อท้าวบุญหนา หลังคาแม่นท้าวปกป้อง ยกขึ้นอ่องต่องกะงามคักแท้แหล่ว
ร้อง) เอิ้นรวมแล้ว คือ ท้าวมั่นขวัญยืน นอนกลางเวรกลางคืน บ่มีโรคมีภัย สิถืกเลขรางวัลใหญ่ขั้น ไผได้ครองเฮือน
ดนตรี…
เทวดา)เว้ามาหนี่ ถืกเหมิด แต่ว่ามาไกลป่านนี้ ได้หยังมานำแนล่ะ ไสเบิ่ง
หมอธรรม) รัตนตรัยกะได้นำมา เพชรนิลจินดา ไร่นาสาโท หาบต้อนจนไม้คานกิ่ว ช้างมาเป็นทิวรถราเกินโหล
เทวดา)มาแล้วสี่เฮ็ดจังได๋
หมอธรรม) แนวบ่ดีไล่ไป ข่อยบ่ได้คุยโว (ดั๋ย) สิให้เหลือแต่ของดีๆ
เทวดา) คันค้ำคูนป่านนี้ ขอให้เจ้าบ้านแสดงโต แนน้า…
ดนตรี
เทวดา)ไสๆ เจ้าจองบ้านชื่อหยัง…
หมอธรรม) พูด…เจ้าของบ้านชื่อ นายบุญ แสนคำ
[ทำนอง]…ผุนี่เจ้าของ สิมาค้ำมาคูน
เทวดา) คันมาค้ำคูณ กะสิยอมให้หนา สิยอมจากไปเฮือนใหม่ดอกนา ให้ลูกหลานที่มา ได้เข้าอยู่ครอง เชิญครับคุณเจ้าของ เชิญเข้ามา บ้านหลังใหม่
หมอธรรม) พูด… เอ้ามาๆ เจ้าของบ้านหลังใหม่เข้ามา…เอ้า อุ้มพระไว้เด้อ
ดนตรีลงช้า…
หมอธรรม) พูด…นี่บันไดเนาะ…
ยามมีโจร ขึ้นมาเที่ยวเฮียนให้เจ้าไล่เด้อ บันไดเอ้ย ให้เจ้าฮ้องเฮียกเอิ้น เจ้าของบ้านให้ตื่นมา
ยามมีโภคาเข้า ของเฮียน เขินขาด ให้เจ้าแล่นลัดต้อน ของใช้ใส่เฮียนเด้อ…สาธุ 3 ครั้ง
ทำนองช้า…ก้าวขึ้นบันได
เหยียบขึ้น 1 ให้เงินหมื่นไหลกอง
เหยียบขั้น 2ให้เงินแสน แล่นเข้า
เหยียบขั้น 3 ฝูงช้างม้า เเล่นมาเฝ้า
เหยียบขั้น 4 ตุ้มเต้า หมู่บริวารเข้ามาซ่อย
เหยียบขั้น 5 ให้แข็งแฮง อย่าเจ็บไข้
เหยียบขั้น 6 ให้ได้ รวยเป็นเศรษฐีเถ้าแก่น้อย
เหยียบขั้น 7 คลาดแคล้ว โทษภัย กะให้ถอย
เหยียบขั้นที่ 8 อย่างน้อยให้เป็น พระยา หัวหน้า หมู่
เหยียบขั้นที่ 9 เงินไหลกองเต็มประตู เต็มถุงปุ๋ย เต็มตู้ ให้ลู่เข้ามา มื่อละแสน…
คำบายศรี......
หมอธรรม)…บ้านหลังนี้เด้อ เทวดาเจ้าทางเจ้าภูมิเจ้าฐาน ที่รักษาบ้านหลังนี้ จนได้มาพ่อเจ้าของที่สิมาค้ำ มาคูน มารักษาดูแลต่อ บาดนี้หมดหน้าที่ของเลา แล้วสิมอบให้เด้อลูกเด้อ
เทวดา)ดูแลรักษาเอาเด้อลูกหลานเอ้ย เอ้ามาๆ พ่อสิผูกแขนให้
...ผูกแขนขวาให้ขวัญเจ้าแล่นใส่ ผูกแขนซ้ายแนวจัญไร ให้หนี
ว่าศรีๆ นี้แม่นฝ้ายมุงคุณ มีผู้ลงมาทูน แก่งคิ้วกงหลา
ฝั้นออกมา นี่ล่ะแม่นจากหลอด ถอดออกมานี่ล่ะแม่นจากปุย กุยออกมาเป็นเส้น เฟ้นออกมาเป็นลำ เส้นหนึ่งนั้น ให้ได้ใสส่อง เส้นสองนั้น ให้แก้วส่องสีใส ฝ้ายของแพงนี่แม่นฝ้ายอันเลิศ ฝ้ายประเสริฐมาจากเมืองสวรรค์ อินทปันลงมาเลาะ 3 รอบ ครอบแล้ว ว่า มื้อนี้ให้มาผูกแขนตนเจ้า ขอให้เงินทองเข้า รุ่งเรือง ไหลหลั่ง สุขล้นอั่ง มีโชคมีชัย สาธุ
ร้อง...
เฮือนหลังนี้ แม่นสิใช้เงินลูกจ่าย จนสมหมาย มาขึ้นเป็นบ้านใหม่
สิบ่มีมื่อนี้ คันบ่มีฮ่มไม้ใหญ่ ต้นโพธิ์ไทร ค้ำบ้าน สองท่านนั้น คือพ่อแม่
ยอขันดอกไม้ ถวยพรหมมาไท้ ทั้งสององค์ กล่าวเชิญสัคเคให้ลง มาเป็นพยานและคอยแล
ถวยเฮือนใหม่หลังนี้ยอจากใจให้พ่อแม่ ให้บารมีมาปกแผ่ลูกชั่วกาล
อยู่เป็นขวัญค้ำบ้าน ให้ลูกนานๆเด้อ พ่อแม่ สาธุ
ผญาจบ
ขึ้นบ้านใหม่ทุกบ้าน พิธีการ สำคัญยิ่ง
เกิดเป็นมิ่งขวัญให้ คนในบ้านได้อยู่เย็น
นับแต่เซ็น เสาจั่วบ้าน บันได้เฮือนไปฮอดขื่อ
บ่แม่นสร้างซื่อๆ ความหมายมี นัยยะซ่อน ซุบ่อนนี้ให้ซุมเลิง
ตั้งแต่เหิงอีสานเค้า ขึ้นบ้านใหม่ของเฮา ลำดับการเป็นจั่งว่า
กาลสมัย ใหม่เข้ามา ฮีตปู่ย่า อย่าป๋าถิ่ม ซูไว้ สิฮุ่งเฮือง นั่นแหลว…ท่านเอย