27 қазанда Алматы облысындағы Пенжім ауылының мектеп территориясында жаппай төбелес шығып, 16 жастағы бала ауруханаға түсті. Бала әлі де ауыр жағдайда.
Осы жайттан кейін ауылда тәртіпсіздіктер орнап, бір топ адам бірқатар жекеменшік үй терезелерін, сондай-ақ бірнеше көлікті сындырғаны хабарланды.
Облыстың атқамінер азаматтары оқиға орнына шұғыл аттанып, ұлтараздықты шиеленістірмеу үшін тұрғындармен жиын өткізді. Бұл жиынға шенеуніктермен қатар танымал айтыскер ақын Жандарбек Бұлғақов та келіп елді сабырлыққа шақырды. Видеоны толық көріп шығыңыз👆
⠀
Пенжім ауылы Алматы облысы Панфилов ауданында, Жаркент қаласынан шығысқа қарай 18 шақырым жерде орналасқан, ол - Пенжім ауылдық округі орталығы. Ауыл арқылы республикалық дәрежедегі Жаркент-Қорғас автомобиль магистралі өтеді.
⠀
Уикипедия ашық энциклопедиясындағы ақпаратқа сәйкес, ауыл 1950-1997 жылдары Калинин атындағы жүгері өсіретін ұжымшардың орталығы болған. Оның негізінде 1997 жылдан Пенжімде және округтегі Ават, Төменгі Пенжім, Қорғас ауылдарында ӨК, ЖШС және бірнеше шаруа қожалығы құрылған.
⠀
Панфилов ауданы әкімдігінің баспасөз қызметінің мәліметінше, Пенжім атауы бұрыннан бар, ол ұйғыр тілінен "бас ауыл" деген мағынаны білдіреді. Ауылдық округте 12 500-ге жуық тұрғын өмір сүреді
⠀
"Олардың ішінде 7 000-нан аса қазақ, 5 000-ға жуық ұйғыр ұлты тұрады. Олар негізінен жүгері, көкеніс өсірумен айналысады. Ал Пенжім ауылының өзінде 5 308 адам тұрады", - деді Панфилов ауданы баспасөз қызметіндегілер.
⠀
Әкімдік ұсынған статистикаға сәйкес, халықтың 22 пайызы, яғни 1014 адам өзін-өзі жұмыспен қамтып отыр. 611 адам шаруа қожалықтарында қызмет етеді. 48 адамның шағын және орта бизнесі бар.
⠀
Халықтың 5,8 пайызы немесе 271 адам білім беру саласында жұмыс істейді. Ал денсаулық сақтау жүйесінде 44 адам. Ауылда 595 зейнеткер бар, бұл халықтың 12,9 пайызы. 172 адам жұмыссыз.