Рет қаралды 400
Qiso: Kisraa iyo Abeeso!
Kitaabka Cajaa’ibta makhluuqaadka ee qazwiinii waxaa ku qoran in maalin maalmaha ka mid ah oo uu Kisraa u fadhiyey kala garsooridda dadka ayaa waxaa u soo gashay abeeso weyn oo qulqulaysa, waxay damceen in ay dilaan wuxuu yiri dhaafa waxaa laga yaabaa in la dulmiyey oo ay dacwo tahayee. Kadib wey baxday waxaa raacay gacan ciidankiisii illaa ay ka tagtay ceel oo ay ku wareegaysatay kadib ceelkii gudihiisa ayey gashay iyadoo fiirinayso abeeso mayd ah oo meesha ku jirtay uuna kor saarnaa hangaralle madow, hangarallihii ayey dileen. Kisraa ayey u yimaadeen oo ay arrintii u sheegeen.
Sanadkii xigay ayey timid abeesadii isla meeshii uu kisraa dadka ugu kala garnaqayey isagoo hawshiisii ku guda jira inta ay hortiisa timid ayey afkeeda ka soo tuftay abuur madow wuxuu amray in abuurkaasi la beero waa la beeray waxaa soo dhashay geedka la yiraahdo reexaanta faarisiiynta (ريحان الفارسي) kisraa wuxuu ahaa mid uu hayey hergab joogto ah iyo madax xanuun badan geedkaas reexaanta ayaa anfacay oo uu ku caafimaaday.
Qofkii caddaaladda ku dedaalo Alle wuu ayyidaa oo caawiyaa beni aadamkana wuu jeclaadaa makhluuqana wuu anfacaa oo wuu adeegaaa, waana loo wada duceeyaa
Waxaa loo baahan yahay guddoomiye iyo qaali fiiro dheer xitaa wax ka ogan kara dhibka ka dhex jira khalqiga Alle.
Xigasho 2aad kitaabka: حياة الحيوان الكبرى