Meer as 4 000 toeskouers het Saterdagaand, 4 Desember, by die Afrikaanse Taalmonument in die Paarl saamgetrek vir die eindstryd van die vyfde jaarlikse ATKV-Rieldanskompetisie.
Van die naweek se groot wenners was die Boesmanland Stofskoppers (van Loeriesfontein) en Witzenberg (van die Ceres-omgewing), wat onderskeidelik as junior en senior kampioene aangewys is.
Veral opvallend was die hoeveelheid jong deelnemers wat vanjaar die riel getrap het. Volgens mnr. Elias Nel, projekorganiseerder by die ATKV, het dié danssoort die afgelope paar jaar "soos 'n feniks uit die as herrys".
Maar wat is die riel? Die dans kry sy naam by die ooreenkomste wat dit toon met die Skotse Reel Dancing. Danspassies uit die Khoi-San en Nama-danstradisies, gemeng met eietydse invloede vorm die boublokke. Meeste deelnemers kom uit die platteland, waar die riel nog die sterkste voortleef.