თავისუფალი და აგრარული უნივერსიტეტების ახალი, საკარანტინო პროექტი - "ჟამის ლექცია" წარმოგიდგენთ თინათინ ქაროსანიძის ლექციას: რა ვიცით ჯიჰადზე?
თანამედროვე მსოფლიოში ისლამისტური დაჯგუფებების ნარატივმა ჯიჰადის შესახებ განსაკუთრებული მნიშვნელობა შეიძინა. ამ ტერმინს ხშირად იყენებენ ამბოხებულები, გათავისუფლების მოძრაობის წევრები თუ ტერორისტული დაჯგუფებები საკუთარი ბრძოლის აღსანიშნავად. ისლამისტების მოსაზრებით, ჯიჰადი არის სამართლიანი ბრძოლა უსამართლო თუ მჩაგვრელი ხელისუფლების წინააღმდეგ. ამით ისინი ამართლებენ საკუთარ ბრძოლას და მიმდევრებსაც ჯიჰადისკენ მოუწოდებენ. მაგ., ალ-კაიდა და მსგავსი ტერორისტული დაჯგუფებები გლობალურ ჯიჰადში მონაწილეობენ, როგორც მუსლიმური მთავრობების, ასევე დასავლეთის წინააღმდეგ, ავღანელი მუჯაჰედები ჯიჰადს აწარმოებდნენ საბჭოთა არმიის წინააღმდეგ, ჰამასი და ჰეზბოლა ისრაელის წინააღმდეგ ჯიჰადში არიან ჩართულები; ალჟირის გათავისუფლების მოძრაობა ასევე ჯიჰადს აწარმოებდა საფრანგეთის კოლონიალიზმის წინააღმდეგ.
შესაბამისად ჩნდება კითხვები ჯიჰადის კონცეფციასთან დაკავშირებით: რა არის ჯიჰადი? არის თუ არა ჯიჰადი შეირაღებული ბრძოლა? არის თუ არა ჯიჰადი საღვთო ომი?
ჯიჰადის კონცეფციამ ისტორიის მანძილზე ბევრი ცვლილება განიცადა და ინტერპრეტაციების წყარო გახდა. ისლამის ისტორიაში ხშირი იყო ჯიჰადის ინტერპრეტაციების მცდელობები, იქმნებოდა ლიტერატურა ჯიჰადის შესახებ, რამაც ჯიჰადის კონცეფცია დისკუსიის და დავის საგნად აქცია.