Рет қаралды 4,373
Suugaan kala duwan oo isugu jirta Waddani, Wacyi-gelin, Diini, Kaftan iwm. Waa 16 tixood oo gabayo, jiiftooyin iyo maansooyinba leh, oo uu dhowaan inoo soo ururiyey Siciid Mahad Digaale (Siciid-amarre). Duubista suugaantan waxaa Siciid-amarre ku weheliya mudane: Cawil D. Ducaale oo leh codka soo-dhoweynta ama hor-dhaca u ah gabayada, ee ay isaga iyo Siciid ka duubayaan abwaannada kala ah:-
- Abwaan: Baashe Saleebaan-weled,
- Abwaan: Jaamac Yuusuf Diiriye (Jaamac-yalax) iyo
- Abwaan / Shiikh: Cabdi Awle Jaamac, oo isagu halkan ku leh, gabay Diini ah, oo uu tiriyey 1915kii oo ku beegan xilligii la-odhan jirey XAARAAMA-CUNE, iyadoo wakhtigaas XAARAAMA-CUNE lagu qiyaaso, intii u dhaxaysey 1912kii ilaa 1916kii.
Waa gabay wacyi-gelin Diini ah, oo uu shiikhu dadkiisa ugaga digayey halista ay ILaahay hortiisa ka leedahay xaaraantu iyo dilka dad islaam ah. EEbbe ha u naxariistee shiikhaas waxa hadda gabaygiisa inoo marinaya Cabdi Cawke Cabdi, oo uu awoow u yahay marxuumkaas gabayga lahaa, iyadoo Cabdina haatan cimrigiisu 80-jir yahay. Waa gabay u qaabaysan hab gaar ah, oo suugaanta aan hore loogu arkin - Xarfaha Qur'aanka Kariimka ah, ayuu intuu ALIF ka bilaabo YA' ku dhammaynayaa, isagoo xaraf walbana miisaankiisa suugaan-ahaan ku tilmaamaya. Gabaygaasi waa ka 16aad ee xidhmadan ugu dambeeya. Waa diyaarintii iyo soo-saaristii Diiwaan Studio, By Dhuux D. Dualeh - London. Sidaas iyo ka-bogasho wacan.