Ajjay Qayamat Nai Aai Most Sad Romantic Love Top Trending Super Hit Punjabi Poetry Whatsapp Status 2023
Poet: Munnu Bhai
"اجے قیامت نہیں آئی"
وال ودھا لئے رانجھے نے تے ٹِنڈ کرا لئی ہِیراں نے
مِرزے خاں نال دھوکھا کِیتا اوہدے اپنیاں تِیراں نے
مِیٹر لا کے خوب چلائی صاحباں اوہدیاں وِیراں نے
پر اجے قیامت نہیں آئی
سُکھ سرہانے بانہہ گوری دُکھ سُوٹے چرسی چِلماں دے
بچے ٹیسٹ ٹیوباں دے، لَو لیٹر فِقرے فِلماں دے
مَت ماری گئی سیانف دی تے بھٹھے بہہ گئے عِلماں دے
پر اجے قیامت نہیں آئی
تاریخ تماشا بُھکھاں دا، تہذیب کھڈونا رَجاں دا
تنقید جگالی لفظاں دی، تشہیر سیاپا لَجاں دا
موسیقی راتب کُتیاں دا تے ادب گتاوا مجھاں دا
پر اجے قیامت نہیں آئی
دِھیاں تِن بشیراں دے گھر، پُتر چار کمالے دے
پَوڑیاں دے وِچ قِصہ مُکا، لوتھ گئی وِچ نالے دے
لوکی بیٹھے رِشتے جوڑن، پِپل تے پرنالے دے
پر اجے قیامت نہیں آئی
روگ ہزاراں، اِکو نُسخہ، اکو راہ گزارے دی
مکھن تاندلیانوالے دا تے ماکھی ضلع ہزارے دی
تِیراں اگے سینہ تانے جُرائت جُھوٹھ غُبارے دی
پر اجے قیامت نہیں آئی
دَھکھ مکوڑے پڑھن نمازاں، دعوے کرن خدائیاں دے
بند کران شراباں نالے پرمٹ لین عیسائیاں دے
وعدے پِیندے آپِیں کردے ناں بدنام ڈیسائیاں دے
پر اجے قیامت نہیں آئی
پارا تھرما میٹر دا، سیاست چوھدری طالب دی
ہیرا منڈی شاہئیے دی تے دِلی مرزا غالب دی
چادر جنرل رانی دی تے چاردیواری جالب دی
پر اجے قیامت نہیں آئی
زیراں دی پَٹی دے مطلب نِکلن لگ پئے زبراں چوں
عینک پا کے انّھے لبھن حق حقیقت خبراں چوں
ٹی وی دِیاں قوالیاں سُن کے مُردے جاگے قبراں چوں
پر اجے قیامت نہیں آئی
روزگار دی سُولی ٹنگے جِیویں کریلے دلاں دے
لوکی بکرے، لیڈر لوبھی قربانی دِیاں کھلاں دے
پُھل کِھڑے قبراں دے اُتے سوہنیاں سوہنیاں گَلاں دے
پر اجے قیامت نہیں آئی
حرف شکایت، ہونٹھ تروپے، قافیئے تنگ ردِیفاں دے
سَنگھی نونہہ غریباں دی، ہتھ کَٹے گئے غریباں دے
لُوہلے لنگڑے پار اُتارن، پُل صراط تعریفاں دے
پر اجے قیامت نہیں آئی
چِٹے ورقے دین شہادت کالی شاہ جہالت دی
سچل وعدہ معاف گواہی، نہیں رہی لوڑ وکالت دی
غُصے دے نال تھر تھر کنبے کُرسی عرش عدالت دی
پر اجے قیامت نہیں آئی
ویری اُچیاں محلاں دے پئے منگن راہ فصیلاں توں
منگن رحم قصائیاں کولوں تے خیرات بخیلاں توں
خواباں دے وِچ بڑھکاں مارن موت ڈراوے مِیلاں توں
پر اجے قیامت نہیں آئی
عزت گئی اُستاداں دی تے بستہ غریب پڑھاکُو دا
سیر گھیو دے مُل وِچ لبھے ہُن اِک پان تمباکُو دا
ہنیرے دے وِچ پتہ نہیں لگدا تھانیدار تے ڈاکو دا
پر اجے قیامت نہیں آئی
نقلی دنداں والے بُڈھے پُچھن بھاء اخروٹاں دے
سبھ توں بَوہتیاں پڑھن کتاباں، بوجھے اوور کوٹاں دے
لیندے پِھرن مُبارکباداں خالی ڈبے ووٹاں دے
پر اجے قیامت نہیں آئی
بیڑی پِھرے آل دوالے ریت وِچ کُھبے چپُو دے
رنڈِیاں وانگوں وِکدے فتوے مولوی مال ہڑپُو دے
پھانسی میلے وِچ پٹُھورے ویچن قاتل پپُو دے
پر اجے قیامت نہیں آئی
لوکی گھراں تے مورچے لا کے کرن حفاظت فوجاں دی
گُردیاں اُتے بنھ سرہانے ملہم لواندے سوجاں دی
سینسر لا کے کرن نمائش اپنے سارے کوجھاں دی
پر اجے قیامت نہیں آئی
ماں دا دُدھ سمجھ کے پی گئے نیک کمائی نانی دی
ملکہ دے دربار وِچ دادے، دی تصویر جوانی دی
پوتریاں نوں نامنظور، حکومت کِسے زنانی دی
پر اجے قیامت نہیں آئی
جُمعے بزار سیاست وِکدی ودھ گئی قیمت گَڈواں دی
میئیں شریف دے پُتراں نے وی ڈھیری لا لئی لڈواں دی
بھٹو دی دِھی تولن بیٹھی بھر ترکڑی ڈڈوآں دی
پر اجے قیامت نہیں آئی
اینی ہوئی منصوبہ بندی نوبت آگئی فاقے دی
ہر اِک چیز کھلوتی لگے سانوں ایس علاقے دی
دھوکھا چلدا اے یا فیر چلدی مرضی بابے سحاقے دی
پر اجے قیامت نہیں آئی
مُنو بھائی
#munnubhai
#munnubhaipoetry
#punjabishayari #punjab #punjabipoetry #punjabi #maaboli
#punjabiboli #shayarilover #shayari #shayri #punjabishayri #instapoetry
#indianpunjabi #instareels #punjabireels #punjabireel #reel #reels #indianpunjabi #lovepoetry #sadpoems #romanticpoetry #poet #poetry #sad #sadshayari #sadshayri