WAEFESO 1:4-5
"Kama vile alivyotuchagua katika yeye kabla ya kuwekwa misingi ya ulimwengu, ili tuwe watakatifu, watu wasio na hatia mbele zake katika pendo. Kwa maana alitangulia kutuchagua, ili tufanywe wanawe kwa njia ya Yesu Kristo, sawasawa na uradhi wa mapenzi yake"
Mungu alitupenda akatuchagua sisi hata kabla ya kuumbwa kwa ulimwengu ili tuwe watakatifu katika Kristo Yesu. Na hii ndio NEEMA YA AJABU. Alituokoa akatuita kwa mwito mtakatifu, si kwa kadiri ya matendo yetu sisi, bali kwa kadiri ya makusudi yake yeye.
NEEMA hii imefunuliwa kwangu si kwa sababu mimi ninastahili kuliko mwingine, si kwa sababu ya uzuri wangu wala matendo yangu bali kwa sababu huo ndio mpango wa Mungu tangu mwanzo wa kuifunua NEEMA yake kwa mwanadamu kupitia YESU KRISTO.
Kupitia NEEMA nimepata kufahamu wito na kusudi la Mungu katika maisha yangu. Nami siishi kana kwamba ni mtu ninayepoteza muda hapa Duniani bali naishi kutumiza kusudi la Mungu hapa Duniani. Neema hii hufunuliwa kwa yeyote aliyeamini ya kwamba Yesu ni BWANA. Hivyo NEEMA hii haiko kwa watu wote bali wale tu wamwaminio Kristo bila kushawishiwa wala kuwa na mashaka, watu ambao hawahitaji kupewa pesa ili wamfanyie Mungu ibada, watu ambao wanaposikia jina la YESU likitajwa wanakumbuka ya kwamba Kwa jina la YESU kila goti linapigwa, na kila ulimi unakiri ya kuwa YESU NI BWANA.
Huwezi kuamsha Neema hii pasipo kumwamini Kristo kwa sababu neema hii ni kwa ajili ya wale wanaotembea kwa imani na sio kwa kuona. Unaihitaji NEEMA hii maana ni mkono wa Mungu utakaoongoza safari ya hatima yako mpaka kwenye udhihirisho wake. Unaihitaji Neema hii ili ufanyike mwana wa Mungu, Mtakatifu wa Mungu, nawe utaweza kufanya mambo ambayo katika siku za kawaida hukuweza kuyafanya, Lakini kupitia Neema utayafanya. Wewe amini tu.
Je, Unaihitaji NEEMA hii?, Amini ukabatizwe nawe utaipokea.
#amazing
#grace
By Lazarus Bernard