ҚИЯҒА ҚАНАТ ҚАҚҚАН БАЛА ҚЫРАН
Жуырда ашылған «Жастар - жарқын болашаққа» тақырыбындағы жаңа рубрикамыздың келесі кейіпкері Милана Сайлаубаева.
Арыстандай айбатты,
Жолбарыстай қайратты.
Қырандай күшті қанатты
Мен жастарға сенемін.
-деп, Мағжан ақын айтқандай, еліміздің көк байрағын биіктететін де, әлем алдында оны танытатын да - бүгінгі жастар!
Жас болса да қоғамдық өмірге белсене араласып, өзінің түрлі идеяларын ұсынып, оларды іске асыруға ұмтылып жүрген қазақтың қаракөз қыздарының бірі - Милана Болатқызы.
Қазіргі таңда Милана Болатқызы Ш.Уәлиханов атындағы Көкшетау университетінің Физика-математика және информатика кафедрасының 2-курс студенті.
Кейіпкеріміздің бойынан - ынта, ықылас, еңбексүйгіштік сынды адами қасиеттер бір-бірімен үндестік тауып, өзінің мақсаттарына сөзсіз жетуіңе кепіл болып отыр. Балалық жастан еңбектеніп, болашағының жарқын болуына аянбай еңбек етіп, бар күш-жігерін салып жүрген белсенді қыз.
Милана Сайлаубаева бірнеше бағытта өзіннің бағын сынап жүр. Волонтерлық санатында жүргеніне екі жылдай уақыт болған. Осы аралықта ол өзінің белсенділігімен барынша көзге түсті.
2023 жылы «Jas Aqmola» облыстық сыйлықтың иегері, Волонтерлық бағыт бойынша қаланың «Үздік Волонтері» иегері атанды. Әртүрлі шетелдік курстарға және «Детский университет» бағдарламасына қатысып, бағын сынады.
«Сегіз қырлы бір сырлы» кейіпкеріміз өнер саласында да осал емес екендігін көрсетіп келеді. Тоғыз жыл Өнер мектебінде хореграфия саласында білім алған. Қазіргі таңда өнер оның хоббиіне айналып отыр.
Сұхбат барысында: «Адам өзінің қызметін шынайы жүрекпен жасаса, оның ішкі мәні ашылады. Бір істі бастамас бұрын шынайы ниет болу керек және сол іске мұқият зейін қоя білу керек», - дейді Милана Сайлаубаева.
«Егер жастар білімге, ғылымға аш болса, биік табысқа жетеді» - деп Бейсен Құранбек айтқандай, әрқашан ізденіс үстінде жүретін жан күнде жаңа бастама, жаңа қадам бастаудан қорықпайды.
Еліміздің ертеңі, болашағымыздың кепілі - білімді, білікті жастардың қолында. Сондықтан да болашағымыз үшін әрекет етуіміз керек. Өйткені, болашақ бүгіннен басталады. Оның берекелі, жарқын болуына іс әрекет жасайтын тек өзіміз!
Жастайынан ізденімпаздыққа ден қойған Милана Болатқызына мықты денсаулық, алдағы уақыттағы істеріңе сәттілік тілейміз! Алар асулары, шығар биіктері көп болсын дейміз.