Жалағаш ауданында мемлекеттік қызметшілер арасында шағын футболдан облыстық турнир өтті. Доп додасына Қызылорда қаласы мен жеті ауданнан командалар қатысып, өзара мықтыны анықтады.
Мемлекеттік қызметші - ел айнасы. Сондықтан олар қай жағынан болмасын көпке үлгі болуы тиіс. Міне, осы орайда халыққа қызмет көрсетіп жүрген сала мамандары демалыс күнін спортқа арнап, салауатты өмір салтын насихаттады. Бұқаралық спортты дамытуға және әріптестер арасындағы байланысты нығайтуға арналған турнирге барлығы 8 команда қатысты.
Сегіз команда екі топқа бөлініп, ойын өрнегін қыздырды. Бірінші топтан жалағаштық жігіттер мен Шиелі командасы үздік шықса, екінші топта Қазалы ауданы мен Қызылорда қаласынан келген аяқдопшылар алғашқы жеңісіне қол жеткізді.
Топтан үздік шыққан командалар өзара сынға түсті. Нәтижесінде жалағаштық жігіттер қазалылық спортшылардан айласын асырса, Қызылорда командасы Шиелі ауданын жеңіп, ақтық кезеңге жолдама алды. Ойын қорытындысымен шиелілік мемлекеттік қызметшілер үшінші орынға ие болса, жергілікті команда екінші, Қызылорда қаласының намысын қорғаған жігіттер бірінші орынды жеңіп алды. Жарыс жеңімпаздарына арнайы кубок пен қаржылай сыйақы табысталды.
Сайт - qyzylordatv.kz/ru/live
Facebook - / qyzylordatv
Instagram - / qyzylordatv
Telegram - t.me/qyzylords_tv
Tiktok - / qyzylorda_tv