Sapat Na Ang Saglit
ni Beverly Cumla
Pasikat na naman ang araw
At magkikita na tayong muli.
Kanina ko pa hinihintay ang iyong pagkatok.
Sapagkat buong gabi akong hindi mapakali.
Mas ginugusto ko na ang umaga dahil kalaban ko ang buwan
Na sa oras na magdilim
ay kailangan mo nang piliing lumisan
Babalik ka sa kaniya.
Habang ako ay maghihintay na lang ulit sa'yo.
Alam ko rin naman, na pansamantala lamang ito
Na matatapos rin ang laro
at magtatago na naman ako
Hahanapin kita, pero di kita makikita
Dahil ikaw, ay nasa piling na niya.
Hindi ko naman ginustong magpakatanga
Sadiyang nagustuhan lang kita kaya sa'yo 'ko naging tanga
Nananatili kahit minsan lang pinipili
Kahit ang tulad ko ay isa lamang panghalili
sa tuwing ang puso mo ay sawi
Kung tatanungin mo ako mahal
na sapat na ba ang SAGLIT
ang isasagot ko ay OO, sakit man ang kapalit
Sapagkat walang nasasayang na minuto
Kapag ikaw ang katabi
Bitbit mo man ang katotohanan na sa kaniya pa rin ang gabi
Tahanan pa rin niya ang iyong daan pauwi
Hindi magsisisi sa pinahiram mong sandali
Sapat na sa'kin ang bilang na minuto
Ang maliit na espasyo
Ang kwentong may dulo
Ang panandaliang ikaw at ako
Sapat na sa'kin ang lahat ng alaala
Sapat na ang minsang nakasama kita
Na minsan mong pinadama ang kaligayahan
Kahit kaakibat nito ay ang katapusan
Hindi na 'ko hihiling ng higit pa
Ayos na sa'kin na malaman mong mahal kita
Kahit may iba
Kahit may nauna
Kahit ilang beses mong ipamukha sa'kin na umpisa lamang ako
At siya pa rin ang kukumpleto ng araw mo
Pagsisilbihan lang kita pero siya pa rin ang pahinga mo
Patatahanin lang kita pero siya pa rin ang magpapaligaya sa'yo
Lilibangin kita, pero siya pa rin ang hahanapin mo
Mamahalin lang kita pero siya pa rin ang mamahalin mo
At oo, maaaring iniisip ng iba kung gaano ako nagpapakaloko
Nagpapakabobo, nagpapakagago
Pero ano nga bang gagawin ko kung ikaw lang mismo ang kaligayahan ko?
Hindi ko naman ginustong magpakatanga
Sadiyang nagustuhan lang kita kaya sa'yo 'ko naging tanga
Nananatili kahit minsan lang pinipili
Kahit ang tulad ko ay isa lamang panghalili
sa tuwing ang puso mo ay sawi
Kaya muli,
Kung tatanungin mo ako mahal
na sapat na ba ang SAGLIT
ang isasagot ko ay OO, sakit man ang kapalit
Sapagkat walang nasasayang na minuto
Kapag ikaw ang katabi
Bitbit mo man ang katotohanan na sa kaniya pa rin ang gabi
Tahanan pa rin niya ang iyong daan pauwi
At kahit kailan ay hindi ako magsisisi sa pinahiram mong sandali
Dito lang ako.
Mag-aaabang sa'yo.
Handang sumalo sa oras na saktan ka ng taong mahal mo.
--
For more updates, follow me on my social media sites listed below:
FACEBOOK PAGE: / bcumla
TWITTER: / beverly_cumla
INSTAGRAM: @beverlycumla
JOIN OUR FACEBOOK GROUP AND BE PART OF THE BEVIES:
/ 11935. .
For business purposes, email me at:
beverly.cumla@gmail.com -
-
#BeverlyCumla #SpokenWord #Poetry #HugotTalk