Hangga't Wala Ka Pa Sa Kaniya
Malabo rin talaga minsan ang tadhana
Sapagkat ang bagay na magkaparehas ay hindi niya mapagtugma
Hinahabol mo siya
Habang hinahabol rin kita
Pero bakit hindi niya tayo mapagtagpo sa gitna?
Parehas naman tayong nanlilimos ng pag-ibig diba?
Nakakapagtaka
Ang gusto mo lang naman ay ang mahalin ka
Pero bakit hindi nalang 'yung pagmamahal ko ang piliin mong makita?
Nandito lang naman ako.
Hindi ako nawala sa tabi mo.
Kahit na araw-araw kong naririnig sa'yo
"Na sana ay mahalin na rin niya ang tulad mo."
Araw-araw akong nagpapakaloko
Nagpapakabaliw, nagpapakabobo
Kakasugal sa taong ilang beses nang tinatalikuran ako.
Pero hindi naman ako nagrereklamo,
Ayokong isipin mong isinusumbat ko ito.
Gusto ko lang malaman mo,
Na kahit gaano kalakas ang pagkakahulog mo sa kaniya
Ay may taong matagal nang sinasalo ka.
Ginusto ko 'to.
Na mapanatunayan sa'yo na may pag-ibig
Na hindi mo na kailangan pang tumakbo
Para humabol.
Sapagkat may pag-ibig na nananatili
Kahit ilang beses na siyang hindi pinipili
Kaya hangga't wala ka pa sa kaniya,
asahan mo na aabangan kita
Sapagkat hindi ako nawawalan ng pag-asa
Na balang araw ay bigla ka nalang magsasawa
Maiinip, mapapagod
'Yung wala ka nang ibang gagawin kundi ang tumalikod
At sa iyong pagtalikod,
Ay makikita mo pa rin akong nakaluhod
Humihiling. Nagmamakaawa.
Na sana sa pagkakataon na 'to ay subukan mo namang maging masaya
Hindi sa pling niya
Kundi dito, sa matagal mo nang kasama pero hindi mo kailanman nakita
Hangga't wala ka pa sa kaniya
Ay hihintayin kita
Hindi ako magpapatalo sa ilang beses na pagkatalo
Magpapatuloy ako tulad ng iyong paghabol
Sa taong paulit-ulit nang lumayo
Hangga't wala ka pa sa kaniya,
Ay ipaglalaban kita
Hindi na alintana ang pagiging mukang tanga
Sapagkat ang higit na mahalaga
Ay 'yung malaman mo kung gaano ka sa'kin kahalaga
Kaya hangga't wala ka pa sa kaniya
Ay hayaan mo 'kong alagaan ka
'Wag mo sanang pigilan ang pag-ibig na ang gusto lang naman
Ay mapagbigyan
Hindi pinagduduldulan
Na ako nalang ang puntahan
Binibigyan pa rin kita ng kalayaan
Para maramdaman ang gusto mong kaligayahan
At kung sakali man,
Na sa kaniya mo 'yun matagpuan
Na siya na mismo ang nagpanalo sa'yo sa laban
Ay asahan
na siguradong ito na ang hangganan
Hahayaan
Na kitang manatili sa'yong tahanan
Hindi na ako muling kakatok pa
Sa oras na sinamahan ka na niya
Sapagkat ayos na sa'kin na ligtas ka
Na hindi ka na mahihirapan pa
Maniwala ka
Na kapag hinagkan ka na niya
Ay ako na ang magkukusa, na dahan-dahang kumawala
Hindi na mangggugulo pa
Pero hangga't wala pa,
Ay hayaan mo muna akong mahalin ka.
--
For more updates, follow me on my social media sites listed below:
FACEBOOK PAGE: / bcumla
TWITTER: / beverly_cumla
INSTAGRAM: @beverlycumla
FOLLOW OUR FAMILY AND BE PART OF THE BEVIES!
/ @officialbevies
For business purposes, email me at:
beverly.cumla@gmail.com -
-
#BeverlyCumla #SpokenWord #Poetry #HugotTalk