Рет қаралды 22,380
#HanggangSaMakalayaKa #SpokenWordPoetry
Hanggang Sa Makalaya Ka
Ilang taon na rin ang nakalipas
simula nang ikulong ka niya
Sa rehas na kandado
At ang susi lamang ay ikaw
Pero nanatili ka dito
Sapagkat takot kang kumawala
Dahil 'di ka sigurado kung dapat na ba ulit magtiwala
Ilang taon ka nang hindi makalabas
Simula nang hinayaan ka niya
Ang rehas ay pagkabigo
At ang susi lamang ay pagtayo
Ngunit nanatili kang nakaupo
Sapagkat takot kang lumaban
Dahil 'di ka sigurado kung muli kang maiisahan
Ilang taon ka nang hindi makausad
Simula nang pigilan ka niya
Ang rehas ay ang nakalipas
At ang susi lamang ay pagkalimot
Ngunit hindi mo 'to ginawa
Sapagkat hindi ka pa handa
Para maging bakante ang diwa sa panibagong mga alaala
Ilang taon ka nang tahimik
Simula nang talikuran ka niya
Ang rehas ay ang mga tanong
At ang susi lamang ay sagot
Ngunit hindi mo ito hinanap
Sapagkat takot kang marinig
Ang mga dahilan kung bakit ka na niya hindi inibig
Ilang taon ka nang lulong sa kaniya
Simula sa kaniyang pagkawala
Ang rehas ay ang galit
At ang susi lamang ay pagpapatawad
Ngunit hindi mo pa ito maibigay
Sapagkat takot kang muling masugatan
Kung hahayaan na maghilom ang pusong iniwanan
Ilang taon mo nang pinipiling hindi maging masaya
Simula nang ipakilala niya sa'yo ang pag-iisa
Ang rehas ay ang pagkawasak
At ang susi ay pagtanggap
Ngunit hindi mo 'to gustong makuha
Sapagkat takot ka, na sa iyong pagkabuo
Ay muli kang masira.
Ilang taon ka nang nasa kaniya
At ilang taon na rin akong nandito sa'yo
Naghihintay sa labas ng rehas
Sa iyong pagbukas
Na baka bukas
Ay gamitin mo na ang susi para muli kang makalabas
At nang sa wakas
Ay piliin mo nang hawakan ang aking mga kamay
Maglalakbay tayo sa kung hanggang saan ang lawak ng mundo
Ipapasyal kita sa kalawakan, at ililigtas sa gitna ng kawalan
Hindi na kita hahayaang bumalik
Magiging tahanan mo ang aking mga halik
Dito ka magpapahinga
Dahil alam ko na masyado ka niyang pinagod sa paghikbi
Bakas sa 'yong mga mata
Ang pamamaga na sanhi ng mga luha
hindi na kita hahayaang umiyak pa
Dahil sa kaniya
Sapagkat ipaparamdam ko sa'yo
Na sa piling ko, ay mas ligtas ka.
Pero habang hindi ka pa handa
Ay iintindihin kita.
'Wag kang mag-alala,
Mahal, maghihintay ako
Hanggang sa Makalaya Ka.
--
For more updates, follow me on my social media sites listed below:
FACEBOOK PAGE: / bcumla
TWITTER: / beverly_cumla
INSTAGRAM: @beverlycumla
JOIN OUR FACEBOOK GROUP AND BE PART OF THE BEVIES:
/ 11935. .
For business purposes, email me at:
beverly.cumla@gmail.com -
-
#BeverlyCumla #SpokenWord #Poetry #HugotTalk