Рет қаралды 10,628
सातपुड्यातील अतिदुर्गम भागात शाळा बंद अवस्थेत, प्रा. कैलास वसावे यांना भेटीदरम्यान आढळले भयानक वास्तव...!!
काल दिनांक 27 डिसेंबर व आज दिनांक 28 डिसेंबर, 2023 रोजी स्थलांतरित आदिवासीमुळे प्राथमिक शिकणावर झालेला परिणाम व शिक्षण हक्क कायद्याची अंमबजावणी यावर आधारित संशोधनकामी (Study on the Impact of Migration on the Primary Education of Tribal Students in Nandurbar District- A socio-legal Inquiry into implementation of Right to Education Act, 2009 in Satpuda Region) या विषयावर माहिती संकलित करण्यासाठी प्रा. रमेश वसावे, समाजकार्य महाविद्यालय, तळोदा यांच्याबरोबर पाहणी करायला गेले असताना जि. प. शाळा वेलखेडी, पालास खोब्रा, माकडकुंड ह्या शाळा बंद आढळल्या तर आश्रमशाळा माकडकुंड व जि. प. शाळा, डेब्रामाळ बंदावस्थेत आढळल्या(या दोन्ही शाळेत फक्त एकेक शिक्षकच उपस्थित होते). बालाघाट येथील जिल्हा परिषद शाळा देखील आज दिनांक 28 रोजी भेट दिल्यावर बंद आढळली. स्थलांतर व इतर कारणामुळे सातपुड्यात आदिवासी शिक्षण फक्त नावालाच असून शाळा कागदावरच भरत असल्याचे दाहक वास्तव या भेटीतून समोर आले. काही शाळेत आळीपाळीने शिक्षक येणे, आठवड्यातून एकदाच शाळा भरणे, शाळेत शिक्षक नियुक्ती झाली असली तर एकदाही काही शिक्षक शाळेत न फिरकणे असे शिक्षणाची थट्टा करणारे प्रकार आजही आदिवासी भागात आहेत हे पाहून प्रचंड चीड आणणारी परिस्थिती आहे. आदिवासी भागात शिक्षणाची दयनीय अवस्था येथील व्यवस्थेने करून ठेवली आहे. मी हे सर्व लिहणार नव्हतो. आपल्या भागाची बदनामी होईल, आपलेच शिक्षक आहेत, हे तर नेहमीच होत राहते, हा स्टंट करतोय म्हणून मलाच लोकं शिव्या देतील असंही वाटलं. पण वास्तव एवढं भयानक असेल तर कोणाला तरी बोलावं लागेल म्हणून ही खटपट..!! थू आहे अश्या शिक्षण व्यवस्थेला.., आणि लाजही वाटते की हे सर्व माझ्या भागात होते. या वास्तव स्थितीची लोकांना माहिती व्हावी म्हणून या व्हिडिओ क्लिप शाळेत जाऊन कार्यालयीन वेळेत तयार केलेले आहेत जे आपल्या माहितीसाठी सादर करीत आहे. बाकी ग्राउंड रिपोर्ट व याबाबतचे अधिक संशोधन पूर्ण झाल्यावर सादर करण्यात येईल.
- प्रा. कैलास वसावे, मोलगी.
Assistant Professor of Law, महाराष्ट्र विधी विद्यापीठ, नागपूर.